لگتا ہے کہ قدرت اپنے راہل گاندھی پر کچھ زیادہ ہی مہر بان ہے … کیوں مہر بان ہے‘ہم نہیں جانتے ہیں ‘ لیکن ہے اور… اور سو فیصد ہے۔اگر نہیں ہو تی تو راہل گاندھی کے سیاسی سفر میں ایک کے بعد ایک اچھی چیزیں ان کیلئے نہیں ہو تیں اور… اور بالکل بھی نہیں ہو تیں ۔ان سے اچھا ہونا بھارت جوڑو یاترا سے شروع ہو ا اور تب سے ان کے ساتھ جو کچھ بھی ہو رہا ہے… اچھا ہی ہو رہا ہے… لندن میں دئے گئے بیان پر ملک اور خاص کر پارلیمنٹ میں جو کچھ بھی ہوا اور ہو رہا ہے… وہ ان کیلئے ہو رہا ہے اور… اور اچھا ہو رہا ہے… کہ اس سے ان کا سیاسی قد بڑھ رہا ہے‘گھٹ نہیں رہا ہے… بالکل بھی نہیں گھٹ رہا ہے … ا بھی پارلیمنٹ میں ان کے لندن میں دئے گئے بیانوں پر تعطل برقرار ہی ہے کہ…کہ سورت کی ایک عدالت نے انہیں ایک کیس میں قصوروار قرار دے کر انہیں دو سال قید کی سزا سنا دی ہے… وہ سب لوگ ‘ جن میں کانگریسی پیش پیش ہیں‘ احمق ہیں جو انہیں غصہ ہے‘جو عدالت کے اس فیصلے کو غیر منصفانہ اور غلط قرار دے رہے ہیں… ارے صاحب ہونے دیجئے جو ہو رہا ہے… اور جو ہو رہا ہے‘ راہل گاندھی کیلئے ہو رہا ہے‘ اور اچھا ہو رہا ہے… اس فیصلے کی وجہ سے راہل گاندھی پارلیمنٹ سے نا اہل بھی ہوئے ‘ اب اگر انہیں جیل بھی جانا پڑتا ہے… تو یہ ایک سیاستدان کیلئے کسی تمغے سے کم نہیں ہے… سیاست میں پارلیمنٹ سے نا اہلی اور جیل جانے سے ہی تو سیاستدان پختہ بن جاتا ہے… اس میں پختگی آ جاتی ہے… اور لوگ اسے اور زیادہ سنجیدگی سے لینا شروع کرتے ہیں… یہ سب قدرت کررہی ہے تو اس میں مداخلت کیوں کہ راہل گاندھی کو اس سب کی ضرورت تھی اور… اور اس لئے تھی کہ سیاسی مخالفین اور نہ ہی لوگ انہیں سنجیدہ لیتے تھے‘ انہیں سیاست میں کوئی پختہ نہیں سمجھتا تھا … کوئی اس کیلئے تیار ہی نہیں تھا … اپوزیشن تو اپوزیشن … کانگریس کے اتحادیوں میں بھی راہل گاندھی کے حوالے سے تحفظات تھے … اب جب قدرت ان کیلئے خود ہی راہیں فراہم کررہی ہے‘ تلاش کررہی ہے تو… تو ہمیں نہیں لگتا ہے اور… اور بالکل بھی نہیں لگتا ہے کہ کانگریس کو اس پر واویلا کرنے کی ضرورت ہے… اور اس لئے نہیں ہے کیونکہ اس سب سے راہل گاندھی کاسیاسی قد بڑھے گا ‘ گھٹے گا نہیں … بالکل بھی نہیں ۔ ہے نا؟