آرٹیکل۳۷۰کی تنسیخ کے بعد جموںکشمیر سیاحت کا مرکز بن گیا ہے: چگ

جموں//
بی جے پی کے قومی جنرل سکریٹری ترون چگ کا کہنا ہے کہ دفعہ۳۷۰کی تنسیخ کے بعد جموں وکشمیر سیاحت کا مرکز بن گیا ہے ۔
چگ نے کہا کہ یہاں۷۵نئے سیاحتی مقامات کی نشاندہی ہوئی ہے جس کیلئے وزیر اعظم نریندر مودی‘ وزیر داخلہ امیت شاہ اور لیفٹیننٹ گورنر منوج سنہا مبارکبادی کے مستحق ہیں۔
بی جے پی جنرل سکریٹری نے ان باتوں کا اظہار جمعرات کو یہاں نامہ نگاروں کے سوالوں کے جواب دینے کے دوران کیا۔
چگ نے کہا’’جب سے مودی جی نے سال۲۰۱۹میں دفعہ۳۷۰کو ہٹایا تب سے جموں و کشمیر ٹریرزم کے مرکز کے بجائے ٹورزم کا مرکز بن گیا ہے ٗ‘۔
بی جے پی کے جنرل سیکریٹری کا کہنا تھا کہ جموں کشمیر میں۷۵نئے سیاحتی مقامات کی نشاندہی کی گئی ہے جس کیلئے میں وزیر اعظم نریندر مودی‘ وزیر داخلہ امیت شاہ اور لیفٹیننٹ گورنر منوج سنہا کو مبارک باد دیتا ہوں جنہوں نے اس کو دنیا کے بڑے بڑے سیاحتی ممالک کے ساتھ جوڑا‘‘۔
چگ نے کہا کہ دنیا بھر سے یہاں سیاح آتے ہیں اور ایشیا کا سب سے بڑا گل لالہ کاباغ سری نگر میں ہی واقع ہے جہاں بھاری تعداد میں سیاح آتے ہیں۔انہوں نے کہا کہ جموں وکشمیر کے ہر کونے میں سیاحوں کو پہنچانے کیلئے یہاں کی سرکار کوشاں ہے ۔