ککر ناگ میں جنگجویانہ سرگرمیوں میں ملوث شہری کا گھر ضبط

سرینگر//
ریاستی تحقیقاتی یونٹ (ایس آئی یو) نے پیر کو جنوبی کشمیر کے اننت ناگ ضلع میں عسکریت پسندانہ سرگرمیوں میں مبینہ طور پر ملوث ہونے کے الزام میں ایک شخص کے گھر کو ضبط کیا۔
ایس آئی یو کے ترجمان نے ایک بیان میں کہا’’انوسٹی گیشن یونٹ نے محمد اسحاق ملک ولد محمد سیف اللہ ملک، ساکن دھنویتھ پورہ کوکرناگ کے گھر کویو اے (پی) اے کی دفعہ ۲۵ کے تحت، اس کے مبینہ طور پر عسکریت پسندانہ سرگرمیوں میں ملوث ہونے کی وجہ سے منسلک کیا‘‘۔
بیان میں کہا گیا ہے کہ ملزم ایف آئی آر نمبر ۱۰۳/۲۰۲۲ سیکشن ۳۰۷ آئی پی سی‘۷/۲۷ آرمز ایکٹ ۱۸‘۲۰‘۲۳‘۳۸ یو اے( پی) ایکٹ پولیس اسٹیشن کوکرناگ کے تحت ملوث ہے اور اس وقت ڈسٹرکٹ جیل اننت ناگ میں بند ہے۔
بیان میں کہا گیا ہے’’ایس آئی یو نے سیکورٹی اہلکاروں کے زیر قبضہ مخصوص جگہ پر جا کر مقامی سرپنچوں، پنچوں اور چوکیداروں کی موجودگی میں گھر پر نوٹس چسپاں کیا‘‘۔
نوٹس کے مطابق، مکان کے مالک کو ’منتقلی، لیز پر دینے‘ بیچنے، اس کی نوعیت کو تبدیل کرنے یا نامزد اتھارٹی کی اجازت کے بغیر مذکورہ پراپرٹی کے ساتھ کسی بھی طریقے سے لین دین کرنے پر روک لگا دی گئی ہے۔