سری نگر/ 14 فروری (ویب ڈیسک)
مرکزی وزیر داخلہ امیت شاہ نے کہا ہے کہ الیکشن کمیشن آف انڈیا کو جموں و کشمیر میں انتخابات کا فیصلہ کرنا ہوگا اور یہ ریاستی درجہ انتخابات کے بعد بحال ہوگا۔
ایک نیوز ایجنسی کو انٹرویو میں شاہ نے کہا کہ انہوں نے واضح طور پر کہا ہے کہ جموں و کشمیر کو ریاست کا درجہ انتخابات کے بعد بحال کیا جائے گا۔
شاہ نے کہا کہ ووٹر لسٹ کی تیاری کا عمل مکمل ہونے کے قریب ہے اور اب الیکشن کمیشن کو انتخابات کا فیصلہ کرنا ہے۔
وفاقی وزیر داخلہ نے یہ بھی کہا کہ 1950 سے جموں و کشمیر سے آرٹیکل 370 کو ہٹانا ان کے ایجنڈے میں شامل تھا۔ انہوں نے کہا ”اب جس طرح سے جموں و کشمیر میں ترقیاتی کام چل رہے ہیں، جس طرح سے عسکریت پسند اور حملے کم ہو رہے ہیں، یہ ثابت ہو رہا ہے۔ آپ اعداد و شمار دیکھ سکتے ہیں“۔
شاہ نے کہا کہ جب سے جموں و کشمیر میں عسکریت پسندی شروع ہوئی تھی، آج عسکریت پسندی سے متعلق اعداد و شمار سب سے کم ہیں۔ انہوں نے مزید کہا”کروڑوں سیاح اور یاتری اب جموں و کشمیر کا دورہ کر رہے ہیں۔ یہ ایک بہت بڑی تبدیلی ہے۔“