این ڈی آر ایف کی ریسکیو ٹیم امدادی سامان کے ساتھ ترکی جائے گی

نئی دہلی//
وزیر اعظم نریندر مودی کی ہدایت پر ترکی میں پیر کو آنے والے تباہ کن زلزلے سے متاثرہ علاقوں میں ہر ممکن طبی امداد اور راحت رسانی کا کام فراہم کرنے کیلئے آج یہاں وزیر اعظم کے دفتر میں ایک میٹنگ میں امدادی سامان کے ساتھ نیشنل ڈیزاسٹر رسپانس فورس (این ڈی آر ایف) اور طبی عملے کی ٹیموں کو وہاں بھیجنے کا فیصلہ کیا گیا۔ یہ کام ترک حکومت کے ساتھ مل کر کیا جائے گا۔
وزیر اعظم کے پرنسپل سیکرٹری ڈاکٹر پی کے ۔ مشرا کی صدارت میں ترکی کو فوری امداد دینے کے اقدامات پر بات چیت کرنے کے لئے ساؤتھ بلاک میں میٹنگ ہوئی جس میں یہ فیصلہ کیاگیا۔
وزیر اعظم کے دفتر سے جاری ہونے والی ریلیز کے مطابق خصوصی تربیت یافتہ ڈاگ اسکواڈ اور ضروری سامان کے ساتھ۱۰۰؍اہلکاروں پر مشتمل این ڈی آر ایف کی دو ٹیمیں تلاش اور بچاؤ کی کارروائیوں کیلئے زلزلہ سے متاثرہ علاقے میں جانے کیلئے تیار ہیں۔ ضروری ادویات کے ساتھ تربیت یافتہ ڈاکٹروں اور پیرا میڈیکل اسٹاف پر مشتمل میڈیکل ٹیمیں بھی تیار کی جارہی ہیں۔ جمہوریہ ترکی حکومت، انقرہ میں ہندوستان کے سفارت خانے اور استنبول میں واقع قونصلیٹ جنرل کے دفتر کے ساتھ مل کر امدادی سامان بھیجا جائے گا۔
میٹنگ میں کابینہ سیکریٹری اور وزارت داخلہ، این ڈی ایم اے ، این ڈی آر ایف، دفاع، وزارت خارجہ، شہری ہوا بازی اور صحت و خاندانی بہبود کی وزارتوں کے نمائندوں نے شرکت کی۔