کولگام میں جیش محمد کے۶جنگجو اعانت کار گرفتار

سرینگر///
پولیس نے جنوبی کشمیر کے ضلع کولگام میں جیش محمد سے وابستہ۶جنگجو اعانت کاروں کو گرفتار کرکے ان کی تحویل سے بھاری مقدار میں اسلحہ و گولہ بارود بر آمد کرنے کا دعویٰ کیا ہے ۔
ایک پولیس ترجمان نے اپنے ایک بیان میں کہا کہ کولگام کے میر ہامہ اور دمہال علاقوں میں تخریبی کاررئیاں انجام پذیر ہونے کے بارے مصدقہ اطلاع موصول ہونے پر کولگام پولیس اور فوج کی۹آر آر کی ایک ٹیم نے مشترکہ آپریشن انجام دے کر چھ جنگجو اعانت کاروں کو گرفتار کیا اور ان کی تحویل سے بھاری مقدار میں اسلحہ و گولہ بارود بھی بر آمد کیا۔
ترجمان نے کہا کہ گرفتار شدگان سے بر آمد کئے جانے والے اسلحہ و گولہ بارود میں ایک پستول، ایک پستول میگزین‘۱۸پستول گولیاں، ایک ہینڈ گرینیڈ‘۴یو بی جی ایل شیل‘ ۳۰؍اے کے۴۷رائفل کی گولیاں‘۴۴۶؍ایم فور گولیاِں‘۸؍ایم فور میگزین، ایک اے کے۴۷میگزین‘۲موٹر شیل‘ایک وائر لس سیٹ اور ۴والکی ٹالکی شامل ہیں۔
بیان میں کہا گیا کہ اس کے علاوہ گرفتار شدگان سے قابل اعتراض مواد بھی بر آمد کیا گیا۔
پولیس بیان میں کہا گیا کہ ابتدائی تحقیقات سے یہ بات سامنے آگئی کہ گرفتار شدگان جیش محمد نامی جنگجو تنظیم سے وابستہ تھے اور وہ مختلف سوشل میڈیا پلیٹ فارمز کی وساطت سے سر حد پار ہینڈلرس کے ساتھ رابطے میں تھے ۔انہوں نے کہا’’ملزمان گرینیڈ حملے کرکے‘ عام شہریوں کو ہراساں کرکے اور اقلیتی فرقے کے لوگوں کو نشانہ بنا کر ضلع کے پر امن ماحول کو خراب کرنے پر تلے ہوئے تھے ‘‘۔
بیان میں کہا گیا کہ اس سلسلے میں دمہال ہانجی پورہ پولیس اسٹیشن میں ایک کیس درج کرکے مزید تحقیقات شروع کی گئی۔