چیف آف ڈیفنس سٹاف کا لائن آف کنٹرول کا دورہ

سرینگر//
چیف آف ڈیفنس سٹاف (سی ڈی ایس ) جنرل انیل چوہان جمعرات کے روز کشمیر وارد ہوئے اور فوری طورپر ایل او سی کا دورہ کیا ۔
معلوم ہوا ہے کہ سی ڈی ایس نے آفیسران سے کہا کہ ہمہ وقت متحرک، چاک و چوبند رہنے کی ضرورت ہے ۔
دفاعی ترجمان نے ٹویٹ کے ذریعے جانکاری دیتے ہوئے بتایاکہ چیف آف ڈیفنس سٹاف جنرل انیل چوہان نے جمعرات کے روز پاکستان کے ساتھ لگنے والی سرحدوں کا دورہ کیا اور وہاں فوجی تیاریوں کے بارے میں آگاہی حاصل کی۔انہوں نے بتایا کہ سی ڈی ایس کے ہمراہ ناردرن کمانڈر لیفٹیننٹ جنرل اوپندر دیودی بھی تھے ۔
اُن کے مطابق سی ڈی ایس کو جموں وکشمیر کی سیکورٹی صورتحال کے بارے میں بھی مکمل جانکاری فراہم کی گئی ۔
ذرائع نے بتایا کہ دورے کے دوران سی ڈی ایس کو دراندازی کی کوششوں کے پیش نظر متعلقہ علاقوں میں ذمہ داریوں اور حفاظتی تیاریوں کے بارے میں جانکاری دی گئی۔
سی ڈی ایس نے فوجی جوانوں سے بھی تبادلہ خیال کیا اور تندہی وپیشہ وارانہ انداز سے اپنے فرائض انجام دینے پر ان کی سراہنا کی۔ سیکورٹی چیلنجوں سے موثر طریقہ سے نپٹنے کیلئے کی جارہی تیاریوں پر بھی سی ڈی ایس نے زور دیا۔
جنرل چوہان نے تمام افسران واہلکاران سے کہاکہ ہمہ وقت متحرک ، چاک وچوبند رہنے کی ضرورت ہے تاکہ دشمن کے ارادوں کو ناکام بنایا جا سکے ۔