ایل جی کا نروال دھماکوں کی شدید مذمت

جموں///
جموںکشمیر کے لیفٹیننٹ گورنر ‘منوج سنہا نے نروال دھماکوں کی شدید الفاظ میں مذمت کرتے ہوئے ان دھماکوں میں زخموں ہونے والے افراد کیلئے پچاس ہزار روپے فی کس ریلیف کا اعلان کیا ہے ۔
ایک سرکاری ترجمان نے ایک بیان میں کہا’’پولیس کے اعلیٰ عہدیداروں نے لیفٹیننٹ گورنر منوج سنہا کو نروال دھماکوں کے متعلق بریف کیا اور انہیں اس سلسلے میں ہو رہی تحقیقات کے بارے میں جانکاری فراہم کی‘‘۔
بیان کے مطابق سنہا نے ان دھماکوں کے ذمہ داروں کی نشاندہی کرنے اور ان کے خلاف کارروائی کرنے کیلئے فوری اقدام کرنے پر زور دیا۔
سنہا نے کہا’’اس طرح کی گھناؤنی حرکتیں قصور واروں کی بزدلی اور مایوسی کی مظہر ہیں‘ فوری اور ٹھوس اقدام کریں، مرتکبین کو انصاف کے کٹہرے میں کھڑا کرنے میں کوئی کسر باقی نہیں چھوڑی جائے ‘‘۔
لیفٹیننٹ گورنر نے زخمیوں کے ساتھ اظہار ہمدردی کرتے ہوئے ان کیلئے پچاس ہزار روپے فی کس ریلیف کا اعلان بھی کیا۔ان کا کہنا تھا کہ انتظامیہ زخمیوں کے بہتر علاج کو یقینی بنائے گی اور ان کے کنبوں کو ہر ممکن مدد فراہم کرے گی۔
بتادیں کہ پولیس کا کہنا ہے کہ جموں کے نروال علاقے میں ہفتے کی صبح قریب پونے گیارہ بجے دو پر اسرار دھماکے ہوئے جن میں۷؍افراد زخمی ہوگئے ۔