سندھیا نے انڈگو کی کولہاپور-بنگلور فلائٹ سروس کو جھنڈی دکھا کر روانہ کیا

نئی دہلی// شہری ہوابازی کے وزیر جیوتیرآدتیہ سندھیا نے کولہاپور اور بنگلور کے درمیان براہ راست پرواز سروس کو ہفتہ کو ہری جھنڈی دکھائی۔
شہری ہوا بازی کی وزارت کی ایک ریلیز کے مطابق یہ پرواز انڈیگو ایئر لائنز کے ذریعے چلائی جا رہی ہے اور ہفتے کے ہر دن کم قیمت پر دستیاب ہوگی۔ اس سروس کے افتتاح کے موقع پر شہری ہوابازی کے وزیر مملکت جنرل (ریٹائرڈ) ڈاکٹر وی کے سنگھ بھی موجود تھے ۔
فلائٹ 6ای 7427 بنگلورو سے دوپہر 2:50 بجے روانہ ہوگی اور 4:45 بجے کولہاپور پہنچے گی۔ کولہاپور سے 6ای 7436 فلائٹ شام 5:05 پر روانہ ہوگی اور شام 6:50 بجے بنگلورو پہنچے گی۔
اس موقع پر بات کرتے ہوئے مسٹر سندھیا نے کہا کہ ان کی وزارت کولہاپور میں ہوا بازی کی سہولیات کی ترقی پر توجہ مرکوز کر رہی ہے ۔ کولہاپور میں 245 کروڑ روپے کی سرمایہ کاری سے ایک نیا ہوائی اڈہ ٹرمنل، رن وے کی توسیع اور نیا ایئر ٹریفک کنٹرول ٹاور تعمیر کیا جائے گا۔ انہوں نے کہا کہ وزیر اعظم نریندر مودی کے خواب اور مشن کے مطابق ملک کے تمام علاقوں میں فضائی خدمات کی توسیع کا کام جاری ہے ۔
جنرل وی کے سنگھ نے اس موقع پر کولہاپور کے لوگوں کو مبارکباد دیتے ہوئے کہا کہ اس سے خطے میں کاروباری سیاحت اور دیگر تجارتی سرگرمیوں کو فروغ ملے گا۔ تقریب میں لوک سبھا ممبر پارلیمنٹ سنجے سداشیو راؤ منڈلک، ایم ایل اے رتوراج سنجے پاٹل، شہری ہوا بازی کی وزارت کے جوائنٹ سکریٹری ایس کے مشرا، انڈیگو کے پرنسپل ایڈوائزر آر کے سنگھ اور دیگر معززین نے شرکت کی۔