انجری کے باوجود آسٹریلین اوپن جیتنے کی امید:جوکووچ

میلبورن// سربیا کے ٹینس لیجنڈ اور 21 بار کے گرینڈ سلیم چیمپئن نوواک جوکووچ نے ہفتہ کو کہا کہ ان میں انجری کے خدشات کے باوجود ریکارڈ 10 واں آسٹریلین اوپن ٹائٹل جیتنے کی صلاحیت ہے۔
ایڈیلیڈ انٹرنیشنل میں کھیلتے ہوئے جوکووچ کی ہیمسٹرنگ میں کھنچاؤ آگیاتھا، جس کا وہ ابھی تک علاج کروا رہے ہیں۔
جوکووچ نے انجری کے بارے میں کہا، “انجری کے باوجود میں ٹائٹل جیتنے کے لیے پر امید ہوں۔ میں نے ہمیشہ اپنے مواقع کو پسند کیا ہے۔ میں اتنی ہی محنت سے ٹریننگ کرتا ہوں، جتنی کوئی اورکرتا ہے۔ اب بہت سارے نوجوان ہیں جو بہت بھوکے ہیں، جو جیتنا چاہتے ہیں۔ وہ بڑے اسٹیڈیم میں آپ کو پیچھے چھوڑنا چاہتے ہیں۔ میں جانتا ہوں۔”
انہوں نے مزید کہا، "لیکن اس طرح کے خاص حالات آپ کو صحیح نقطہ نظر رکھنے اور چیزوں کو صحیح طریقے سے کرنے میں مدد دیتے ہیں۔ مجھے معلوم ہے کہ جب میں فٹ ہوتا ہوں اور اپنی بہترین کارکردگی کا مظاہرہ کرتاہوں، تو اس کورٹ (راڈ لیور ایرینا) پرمیرے پاس کسی کو بھی شکست دینے کا موقع ہے۔”
جوکووچ نے بتایا کہ وہ اگلے ہفتے کے لیے اپنی توانائی کو بچانے کی کوشش میں تربیتی سیشن میں اپنا 100 فیصد نہیں دے رہے تھے۔ انہوں نے امید ظاہر کی کہ اس ہیمسٹرنگ کی وجہ سے انہیں گرینڈ سلیم ٹورنامنٹ میں کوئی پریشانی نہیں ہوگی۔
سربیا کے اسٹار کھلاڑی جوکووچ کو کووڈ ویکسنیشن کے حوالے سے سخت رخ اختیار کرنے کی وجہ سےگزشتہ سال اس گرینڈ سلیم ٹورنامنٹ میں کھیلنے کی اجازت نہیں دی گئی تھی اور انہیں آسٹریلیا سے ڈی پورٹ کر دیا گیا تھا۔
تاہم، انہوں نے اے ٹی پی فائنل جیت کر 2022 کا شاندار اختتام کیا اور ایڈیلیڈ انٹرنیشنل میں اپنے کیریئر کے 92 ویں ٹائٹل کے ساتھ نئے سال کا آغاز کیا۔
آسٹریلیا واپسی پر، جوکووچ نے کہا، "میں اس قسم کی توانائی اور خوش آمدید، محبت اور حمایت کے لیے بہت مشکور ہوں۔”