نیشنل اسٹیڈیم کرکٹ ایرینا (نیشنل اسٹیڈیم) کراچی میں سیریز کے پہلے ون ڈے میچ میں نیوزی لینڈ کے کپتان کین ولیمسن اسامہ میر کی گیند پر کلین بولڈ ہو کر ہکا بکا رہ گئے۔
26 رنز بنا کر وکٹ پر موجود کین ولیمسن کو اپنا پہلا میچ کھیلنے والے اسامہ میر نے خوبصورت لیگ بریک کی مدد سے کلین بولڈ کر کے بین الاقوامی کرکٹ میں اپنی وکٹوں کا کھاتہ اس بڑی وکٹ کے ساتھ کھولا۔
لیگ اسٹمپ پر پڑنے والی اس گیند کو ولیمسن نے ڈیفینڈ کرنے کی کوشش کی لیکن وہ ایسا کرنے میں ناکام رہے اور گیند جاکر مڈل اور آف اسٹمپ سے ٹکرا گئی۔
کین ولیمسن بولڈ ہونے کے بعد ہکا بکا نظر آئے، لیکن اگلے ہی لمحے انہوں نے پویلین کی جانب چلنا شروع کردیا۔
