بکسر: احمد آباد-پٹنہ کلون ایکسپریس سے شراب کے ساتھ 19 اسمگلر گرفتار

بکسر// ریلوے پروٹیکشن فورس (آر پی ایف) اور جی آر پی نے بہار کے بکسر ریلوے اسٹیشن سے تقریباً 10 لاکھ روپے کی شراب کے ساتھ 19 اسمگلروں کو گرفتار کیا ہے ۔
آر پی ایف انسپکٹر دیپک کمار نے آج یہاں بتایا کہ بکسرجی آر پی اور آر پی ایف نے سینئر افسران کی ہدایت پر احمد آباد- پٹنہ کلون ایکسپریس میں دلدار نگر سے مشترکہ طور پر چیکنگ شروع کی۔ جیسے ہی ٹرین بہار کی سرحد پر پہنچی تو ایک بوگی میں سوار کچھ لوگوں نے پولیس کو دیکھ کر ادھر ادھر بھاگنے کی کوشش کی۔ اس پرجوانوں کو شک ہوا۔ جوانوں نے بوگی میں چھان بین تیز کی تو مختلف بوگیوں سے شراب ملنے لگی۔
مسٹر کمار نے بتایا کہ اس دوران پہلے ایک ا سمگلر پکڑا گیا اور بعد میں اس کی اطلاع پر مختلف بوگیوں میں چھاپے ماری کر 19 اسمگلروں کو پکڑا گیا۔ اس کے ساتھ 1214 لیٹر شراب بھی ضبط کی گئی۔ برآمد شدہ شراب کی مالیت تقریباً 10 لاکھ روپے بتائی جارہی ہے ۔ گرفتار ا سمگلروں کو تفتیش کے بعد جیل بھیج دیا گیا ہے ۔