ڈونلڈ نے کوہلی کا موازنہ سچن سے کیا

ڈھاکہ// بنگلہ دیش کے کوچ ایلن ڈونلڈ نے بدھ کو وراٹ کوہلی کا سچن تندولکر سے موازنہ کرتے ہوئے کہا کہ کوہلی کے خلاف درست گیند بازی ان کی پہلی ترجیح ہے۔
ڈونالڈ نے دوسرے ٹیسٹ سے قبل یہاں منعقدہ پریس کانفرنس میں کہا، ’’وہ (کے ایل راہل اور کوہلی) قیمتی وکٹیں ہیں۔ یہ ایسا ہی ہے جیسے سچن تندولکر کریز پر آتے ہیں۔ آپ جانتے ہیں کہ ان کے خلاف اچھی بولنگ کرنا اولین ترجیح ہے۔ جب کوہلی رنگ میں ہوں اور آپ ان کے خلاف مواقع کھو دیتے ہیں تو آپ کو خمیازہ بھگتنا پڑتا ہے۔ ایسے کھلاڑی آپ کو بار بار موقع نہیں دیتے۔
ڈونلڈ نے کہا، "میرے مطابق ہم نے کوہلی اور راہل کے خلاف بہت اچھی گیند بازی کی۔ یہ لارا کے خلاف بولنگ کرنے جیسا ہے۔ میدان میں اچانک پارہ چڑھ جاتا ہے۔ میں جانتا ہوں کہ وراٹ اس سیریز کو سنچری کے ساتھ ختم کرنا چاہتے ہیں لیکن مجھے لگتا ہے کہ ہم نے ان کے خلاف اچھی گیند بازی کی ہے اور امید ہے کہ ہم اسے کل بھی جاری رکھ سکیں گے۔
ہندستان اور بنگلہ دیش کی ٹیمیں جمعرات سے دوسرے ٹیسٹ میچ میں آمنے سامنے ہوں گی۔ کوہلی اور راہل پہلے ٹیسٹ میں زیادہ رن نہیں بنا سکے لیکن چیتشور پجارا (90، 102 ناٹ آؤٹ)، شوبمن گل (110) اور شریاس ایئر (86) بنگلہ دیشی گیند بازوں کی غیرموثر کارکردگی کی وجہ سے بڑی اننگز کھیلنے میں کامیاب رہے۔
ڈونلڈ نے کہا کہ وہ اپنے گیندبازوں سے جارحانہ کارکردگی کی توقع رکھتے ہیں جس کے لیے وہ کئی بار انگلینڈ کی مثال بھی استعمال کر چکے ہیں۔
ڈونلڈ نے کہا کہ میں نے ہمیشہ پاکستان میں انگلینڈ کے گیندبازوں کی کارکردگی کی مثال پیش کی ہے۔ وہ میچ میں خود کو کس طرح لیکر آتے ہیں۔ تین اسپنروں کے باوجود آپ کو ایک تیز گیند باز کے طور پر کچھ زیادہ وسیع ہونے کی آزادی ہوتی ہے۔ آپ شارٹ اور فل گیندبازی کر سکتے ہیں۔ آپ چار اوور کے لیے تمام تجربات کر سکتے ہیں۔
انہوں نے کہا، “اگر آپ نے چٹاگاوں میں محمد سراج یا امیش یادیو کی بولنگ دیکھی ہے تو آپ کو معلوم ہوگا کہ یا تو وہ شارٹ گیندیں کر رہے تھے یا اٹیک کر رہے تھے۔ انہوں نے بہت سے فیلڈروں کو کیچ کے لئے نزدیک کھڑا کر دیا تھا۔ کاش ہم تھوڑا اور حملہ کر سکتے۔ ان پچوں پر گیند سے بچنا آسان نہیں ہے، لہذا اگر آپ کے پاس کچھ رفتار ہے، تو آپ کچھ زیادہ جارحانہ ہو سکتے ہیں۔
چٹاگاوں ٹیسٹ کی پہلی اننگز میں 150 رن پر سمٹ جانے کے بعد بنگلہ دیش نے دوسری اننگز میں اچھی بیٹنگ کرتے ہوئے 324 رن بنائے، حالانکہ اس وقت تک میچ ان کے ہاتھ سے نکل چکا تھا اور انہیں 188 رن کی شکست کا سامنا کرنا پڑا تھا۔
ٹیم کی بیٹنگ کے بارے میں ڈونلڈ نے کہا کہ دوسری اننگز کی بیٹنگ ہمارے لیے ایک سانچہ ہے۔ آپ کو ایک بار موقع ملتا ہے۔ اگر آپ ٹاس جیت کر پہلے بیٹنگ کرتے ہیں تو 350-380 رن بنائیں۔ پہلی اننگز میں رن بہت قیمتی ہوں گے۔ پچ بہت خشک لگ رہی ہے، اس لیے آپ کو پہلی اننگز کا فائدہ اٹھانا ہوگا۔
انہوں نے کہا، "یہ آپ کے لیے پہلی اننگز میں اپنے طریقے سے ٹیسٹ میچ ترتیب دینے کا واحد موقع ہے۔ اگر ہم بولنگ کرتے ہیں، تو ہم نے گیند سے بھی ایسا کرکے دکھایا ہے، جب ہم نے ہندوستان کا اسکور 48/3 کر دیا تھا۔ ہم نے کچھ مشکل مواقع گنوائے لیکن ہم اس سطح تک نہیں گر سکتے۔”