بارہمولہ میں لشکر کا جنگجو اعانت کار گرفتار، اسلحہ و گولہ بارود بر آمد:پولیس

سرینگر//
جموں کشمیر پولیس نے شمالی کشمیر کے ضلع بارہمولہ میں لشکر طیبہ سے وابستہ ایک جنگجو اعانت کار کو گرفتار کرکے اس کے انکشاف پر اسلحہ و گولہ بارود بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ ایک مصدقہ اطلاع موصول ہونے پر پولیس اور فوج کی۳۲آر آر کی ایک مشترکہ پارٹی نے بارہمولہ میں اتوار کو ایک آپریشن کے دوران لشکر طیبہ سے وابستہ ایک جنگجو اعانت کار کو گرفتار کیا۔
ترجمان نے گرفتار شدہ کی شناخت محمد اسحاق لون ولد بشیر احمد لون ساکن نادی ہال سوپور کے بطور کی ہے ۔
بیان میں کہا گیا’’گرفتار شدہ کے انکشاف پر ایک آئی ای ڈی کینسٹر، ایک پستول، ایک پستول میگزین‘۱۸پستول گولیاں اور۸میٹر بجلی تار بر آمد کی گئی‘‘۔
پولیس ترجمان نے کہا کہ اس ضمن میں پولیس اسٹیشن بارہمولہ میں ایک کیس درج کرکے مزید تحقیقات شروع کی گئیں۔
بیان کے مطابق اسلحہ وگولہ بارود کی بر وقت ضبطی سے جنگجوؤں کے ایک بڑے حملے کو ٹالا گیا۔