بابراعظم میں گولف کھیلنے کا شوق بھی بڑھنے لگا

لاہور //
پاکستان کرکٹ ٹیم کے کپتان بابر اعظم میں گولف کا شوق بھی بڑھنے لگا ۔ملتان ٹیسٹ پانچویں روز تک نہ پہنچا جس کے باعث کراچی روانگی سے قبل بابر اعظم کو جب ایک روز فری ملا تو وہ ملتان کے رومانزا گولف کورس پر گولف کھیلنے کے لیے پہنچ گئے۔بابر اعظم نے گولف کھیلتے ہوئے بھرپور وقت گزارا اور 18 ہولز مکمل کیے۔
بابر اعظم کے ہمراہ امپائر ماریس ایراسمس بھی تھے۔بابر اعظم نے گولف کورس کی تعریف کرتے ہوئے انتظامیہ سے دوبارہ یہاں دیگر کھلاڑیوں کے ہمراہ آنے کا کہا۔
کپتان بابر اعظم کو جب بھی وقت ملتا ہے تو وہ اکثر گولف کھیلنے کے لیے جاتے ہیں۔بابر اعظم لاہور میں ڈیفنس رایا گولف کلب میں گولف کھیلتے ہیں۔سابق اور موجودہ کرکٹرز میں ان دنوں گولف کھیلنے کا بہت زیادہ شوق پایا جاتا ہے۔
کھلاڑی اکثر سیریز یا کسی ٹورنامنٹ کے دوران گولف کھیلنے کے لیے وقت نکالتے ہیں اور تازہ دم ہوتے ہیں۔سابق کرکٹر وسیم اکرم، وقار یونس اور محمد حفیظ بھی اب باقاعدگی سے گولف کھیلتے ہیں۔اس کے علاوہ کراچی روانگی سے قبل انگلینڈ کرکٹ ٹیم کے اسکواڈ نے بھی گولف کورس پر وقت گزارا تھا۔ملتان ٹیسٹ شروع ہونے سے پہلے بھی انگلش کرکٹرز نے گولف کھیلی تھی۔