آزادی کے امرت مہوتسو کے دوران جی 20 کی صدارت ہندوستان کے لیے باعث فخر: لوک سبھا اسپیکر

نئی دہلی// لوک سبھا کی کارروائی کی صدارت کرتے ہوئے ایوان کے اسپیکر اوم برلا نے آج G-20 کی صدارت سنبھالنے پر ہندوستان کے تمام اسٹیک ہولڈرز کو مبارکباد پیش کی۔
لوک سبھا میں تقریر کرتے ہوئے مسٹر برلا نے کہا کہ آزادی کے امرت مہوتسو کے دوران جی20 کی ہندوستان کی سربراہی جیسی اہم عالمی ذمہ داری ملک اور اہل وطن کے لئے فخر کی بات ہے ۔ اس موقع پر انہوں نے حکومت ہند اور ہم وطنوں کو مبارکباد پیش کی ۔
مسٹر برلا نے کہا کہ 2023 میں جب ہندوستان جی20 سربراہان مملکت کے سربراہی اجلاس کی قیادت کرے گا، جی20ممالک کی پارلیمانوں کے پریذائیڈنگ افسران بھی ہندوستان کی پارلیمنٹ کی قیادت میں ہوں گے ، اور یہ کانفرنس ہندوستانی سیاست کا ایک اہم باب ہوگا اور ہندوستان کی سفارتی تاریخ میں ایک سنگ میل ہوگا ۔
کانفرنس کے موضوع پر بات کرتے ہوئے مسٹر برلا نے کہا کہ کانفرنس کا تھیم "ایک زمین، ایک خاندان، ایک مستقبل” ہے جو ہندوستان کے واسودھیوا کٹمبکم کے اصولوں کے مطابق ہے ۔ مسٹر برلا نے کہا کہ کانفرنس کے دوران ہندوستان اپنی کثیر رنگی ثقافتی وراثت اور متحرک جمہوریت کی طاقت کو دنیا کے سامنے پیش کرے گا اور پوری دنیا میں قائدانہ کردار ادا کرے گا۔
مسٹر برلا نے تمام عوامی نمائندوں اور ہندوستان کے لوگوں سے اس موقع کو شایان شان طریقے سے منانے کی اپیل کی۔