نئی دہلی// ماسٹر بلاسٹر سچن تندولکر نے یونیسیف کی جانب سے بچوں کے عالمی دن پر منعقد ایک پروگرام میں جمعہ کو بچوں سے کہا کہ کھیل ہمیں بہتر انسان بننے میں مدد دیتے ہیں۔
سچن نے یہاں تیاگراج اسٹیڈیم میں منعقدہ تقریب میں کہاکہ ’’میں نے ہمیشہ یہ یقین کیا ہے کہ کھیل ہمیں بہت سی زنجیروں سے آزاد کرتے ہیں اور ہمیں بہتر انسان بننے میں مدد دیتے ہیں۔ کھیلوں اور بچوں کے حقوق کو جوڑنے کے لیے یونیسیف کی کوششیں قابل تعریف ہیں۔ جب تک آپ کے دل میں جذبہ ہے کھیل آپ کا ہے۔‘‘
اس موقع پر بچوں کے درمیان ایک دوستانہ فٹ بال میچ کھیلا گیا جس میں سچن تنڈولکر اور یونیسیف کے ایلچی برائے حقوق اطفال آیوشمان کھرانہ نے شرکت کی۔
اس موقع پر بات کرتے ہوئے نوجوانوں کے امور اور کھیلوں کی وزارت کی سکریٹری میتا راجیولوچن نے کہاکہ”نوجوانوں کے امور اور کھیلوں کی وزارت پورے ملک میں رضاکارانہ تنظیموں کے ذریعے نوجوانوں کی مکمل اور مجموعی بہبود اور ترقی پر توجہ مرکوز کر رہی ہے۔ ہمیں اس بات کو یقینی بنانے کا عہد کرنا چاہیے کہ اس ملک کے ہر بچے اور نوجوان کے پاس وسائل، ہنر، مواقع اور جگہ موجود ہو تاکہ وہ ہندوستان کو ایک روشن کل کی طرف لے جانے کے لیے اپنا کردار ادا کر سکے۔‘‘
آیوشمان کھرانہ نے کہاکہ “جب ہم کھیلتے ہیں تو ہم ایک ٹیم بن جاتے ہیں اور ہمیں احساس ہوتا ہے کہ ہمارا عزم، جذبہ اور جوش ہی سب کچھ ہے۔ ہم یہاں جشن منانے آئے ہیں۔ آئیے تمام بچوں کے لیے برابری اور شمولیت کو فروغ دینے کے لیے لڑکیوں اور لڑکوں کو بااختیار بنائیں۔ میں یونیسیف کا شکریہ ادا کرتا ہوں کہ اس تقریب کو ایک ایسے موضوع پر منعقد کیا جو مجھے پسند ہے۔
