سرینگر//
کشمیر کے ڈویڑنل کمشنر‘ پی کے پولے نے پیر کو کہا کہ جب تک موسم اجازت دیتا ہے اسکول کھلے رہیں گے۔
پولے نے کہا کہ تدریسی عمل اُس وقت تک جاری رہے گا جب تک وادی کے میدانی علاقوں میں بھاری برف باری نہیں ہوتی ہے۔
صوبائی کمشنر نے یہاں ایک تقریب کے موقع پر صحافیوں سے بات کرتے ہوئے ’’ کوئی وضاحت کی ضرورت نہیں ہے۔ ہر سال، جب شہر سمیت میدانی علاقوں میں بھاری برف باری ہوتی ہے، تو اسکول چھٹیوں کے لیے بند کردیئے جاتے ہیں‘‘۔
پولے نے کہا’’یہ فطرت پر منحصر ہے اور ہو سکتا ہے کہ اسکول کی تعلیم۱۵ دسمبر سے آگے جاری رہے گی۔ ڈائریکٹر اسکول ایجوکیشن کشمیر کی طرف سے پہلے ہی واضح کیا گیا ہے اور ہر سال، نہ صرف اس سیزن میں، اسکول اس وقت تک کھلے رہیں گے جب تک کہ بڑی برف باری نہ ہو۔ یہ سب موسم پر منحصر ہے‘‘۔
دریں اثناجموں کشمیر کے کشتواڑ اور ڈوڈہ اضلاع میں آٹھویں جماعت تک کے سکولوں کو تا حکم ثانی بند رکھنے کے احکامات صادر کئے گئے ۔
بتادیں کہ خط چناب میں اتوار اور پیر کی درمیانی شب سے موسلا دھار بارشیں اور برف باری کے باعث کئی علاقے کٹ کررہ گئے ہیں۔
اطلاعات کے مطابق محکمہ تعلیم کی جانب سے جاری کئے گئے حکم نامہ کے مطابق خراب موسمی صورتحال کے باعث ڈوڈہ اور کشتواڑ اضلاع میں آٹھویں جماعت تک کے اسکولوں کو بند رکھنے کے احکامات صادر کئے گئے ہیں۔انہوں نے بتایا کہ ڈوڈہ اور کشتواڑ اضلاع میں سبھی پرائیوٹ اورسرکاری مڈل اسکول تک کی کلاسیں معطل رہیں گی۔
اُن کے مطابق نویں سے لے کر دیگر جماعتوں کے سکول معمول کے مطابق کھلیں رہیں گے ۔
واضح رہے کہ خط چناب کے ڈوڈہ اور کشتواڑ اضلاع کے دور افتادہ علاقوں میں بھاری برف باری کے باعث کئی علاقے ضلع صدر مقامات سے کٹ کر رہ گئے ہیں جبکہ ان علاقوں میں ٹریفک کی آمدورفت بھی معطل ہے ۔