بھدرواہ//
جموں کشمیر کے ڈوڈہ ضلع میں بٹوٹ،کشتواڑ قومی شاہراہ پر اسر کے ترنگل علاقے میں ایک سڑک حادثے میں سڑک اور عمارتوں (آر اینڈ بی) محکمہ کے چار افسران بشمول سپر انٹنڈنگ انجینئر(ایس ای) اور ایگزیکٹو انجینئر کی موت ہو گئی۔
پولیس کے ایک اہلکار نے بتایا کہ ایک سرکاری گاڑی جس میں آر اینڈ بی ڈوڈہ کے تین افسران بشمول ایس ای ‘اے ای ای اور ایگزیکٹو انجینئر سوار تھے سڑک سے پھسل کر ۳۷کلومیٹر ڈوڈہ قصبہ بٹوٹ، کشتواڑ قومی شاہراہ پر واقع ترنگل پل کے قریب ۲۰۰ میٹر گہری کھائی میں گر گئی۔
پولیس اہلکار نے بتایا’’حادثہ بظاہر آج صبح پونے گیارہ بجے دھند اور تیز بارش کی وجہ سے کم نظر آنے کی وجہ سے پیش آیا۔ پولیس اسٹیشن اسر کی ایک پولیس پارٹی مقامی لوگوں کے ساتھ موقع پر پہنچی اور ریسکیو آپریشن شروع کیا لیکن موقع پر چار میں سے تین افراد کی لاشیں پائی گئیں جبکہ زخمی کو طبی مرکز منتقل کر دیا گیا ہے‘‘۔
ہلاک ہونے والے آر اینڈ بی اہلکاروں کی شناخت پونچھ کے رہنے والے ایگزیکٹیو انجینئر ڈوڈہ رفیق شاہ، ادھم پور کے رہنے والے اے ای ای کمل کشور اور ڈوڈہ کے ڈرائیور عبدالحفیظ کے طور پر کی گئی ہے۔
پولیس اہلکار نے بتایا کہ زخمی ایس ای جو کہ سی ایچ سی اسر میں زیر علاج تھا دم توڑ گیا ہے۔ اس کی شناخت جموں کے سریش کمار کے طور پر ہوئی ہے۔
پولیس نے اس ضمن میں ایک کیس درج کرکے مزید تحقیقات شروع کی ہیں۔
دریں اثنا جموںکشمیر کے لیفٹیننٹ گورنر‘ منوج سنہا نے ڈوڈہ میں پیش آئے سڑک حادثے میں انسانی جانوں کے زیاں پر رنج و غم کا اظہار کیا ہے ۔
سنہا نے کہا’’میں نے ضلع انتظامیہ کو متاثرین کو تمام ممکن مدد فراہم کرنے کی ہدایت دی‘‘۔
لیفٹیننٹ گورنر نے اس حادثے پر اظہار رنج و غم کرتے ہوئے اپنے ایک ٹویٹ میں کہا’’ڈوڈہ میں ہونے والے سڑک حادثے میں انسانی جانوں کے زیاں سے صدمہ ہوا‘‘۔
سنہا نے ٹویٹ میں کہا’’میں پسماندگان کی خدمت میں تعزیت پیش کرتا ہوں اور زخمی افسر کی فوری صحتیابی کیلئے دعا گو ہوں‘‘۔ان کا مزید کہنا تھا’’میں نے ضلع انتظامیہ سے متاثرین کو تمام ممکن امداد فراہم کرنے کی ہدایت دی ہے ۔‘‘
ادھرسرینگر جموں شاہراہ پر شیر بی بی کے نزدیک دو گاڑیوں کے درمیان آپسی ٹکر کے نتیجے میں دو افراد زخمی ہوئے ہیں۔
اطلاعات کے مطابق پیر کے روز سرینگر جموں شاہراہ پر شیر بی بی چنار پوائنٹ کے نزدیک ٹاٹا سومو اور نجی گاڑی کے درمیان ٹکر ہوئی ۔انہوں نے بتایا کہ اس حادثے میں دو افراد زخمی ہوئے جنہیں علاج ومعالجہ کی خاطر نزدیکی ہسپتال منتقل کیا گیا۔
معلوم ہوا ہے کہ زخمیوں کی حالت خطرے سے باہر ہے ۔
بتادیں کہ سرینگر جموں شاہراہ پر پیر کی صبح سے بارشوں کا سلسلہ جاری ہے جس وجہ سے شاہراہ پر پھسلن پیدا ہونے کے باعث ڈرائیوروں کوگاڑیاں چلانے میں دقتیں پیش آرہی ہیں۔