سرینگر//
جموںکشمیر پولیس نے شمالی کشمیر کے قصبہ سوپور میں لشکر طیبہ سے وابستہ دو ہائی برڈ جنگجوؤں کو اسلحہ و گولہ بارود سمیت گرفتار کرنے کا دعویٰ کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ سوپور پولیس اور فوج کی۲۲آر آر کی ایک مشترکہ ٹیم نے جمعے کی شام سوپور کے شاہ فیصل مارکیٹ میں تلاشی آپریشن شروع کر دیا۔
ترجمان نے کہا’’آپریشن کے دوران ایک شخص کو ایک بیگ لے کر سوپور بس اڈے سے شاہ فیصل مارکیٹ کی طرف مشکوک حالت میں آتے ہوئے دیکھا گیا‘‘۔
ان کا کہنا تھا کہ مذکورہ شخص کو رکنے کا اشارہ کیا گیا لیکن اس نے جائے موقع سے فرار ہونے کی کوشش کی تاہم سیکورٹی فورسز نے اس کو موقعے پر ہی دھر لیا۔
بیان کے مطابق مذکورہ شخص کے بیگ کی تلاش کی گئی جس سے ایک پستول، ایک پستول میگزین، کچھ گولیاں اور ایک آئی ای ڈی بر آمد کی گئی۔
بیان میں کہا گیا کہ ابتدائی پوچھ تاچھ کے دوران گرفتار شدہ شخص نے اپنی شناخت رضوان مشتاق وانی ولد مشتاق احمد وانی ساکن ہامرے پٹن کے بطور کی۔
ترجمان نے اپنے بیان میں کہا کہ ابتدائی تحقیقات سے منکشف ہوا ہے کہ گرفتار شدہ شخص لشکر طیبہ کا ہائی برڈ جنگجو ہے اور وہ غیر مقامی مزدوروں، سیکورٹی فورسز اور اور پر امن شہریوں پر حملہ کرنے کی تاک میں تھا۔انہوں نے کہا کہ رضوان مشتاق نے پوچھ تاچھ کے دوران اپنے ایک اور ساتھی کا انکشاف کیا اور اس کی شناخت جمیل احمد پرہ ولد حبیب اللہ پرہ ساکن تاپر پٹن کے بطور کی۔
ترجمان نے کہا کہ بعد ازاں بارہمولہ پولیس کی مدد سے جمیل احمد پرہ کو بھی گرفتار کیا گیا اور مزید اسلحہ بر آمد کیا گیا۔انہوں نے کہا کہ دونوں کی پوچھ تاچھ جاری ہے اور مزید گرفتاریاں اور اسلحہ کی بر آمدگی متوقع ہے ۔
پولیس نے اس ضمن میں پولیس اسٹیشن سوپور میں ایک کیس درج کیا ہے ۔
اس دوران پولیس نے ہفتے کے روز شمالی کشمیر کے بانڈی پورہ ضلع میں لشکر طیبہ تنظیم سے تعلق رکھنے والے ایک ہائبرڈ جنگجو کو گرفتار کرنے کا دعویٰ کیا ہے۔
ایک بیان میں‘پولیس نے کہا کہ آج بانڈی پورہ پولیس کو حاجن کے چیک چندرگیر علاقے میں لشکر طیبہ کے جنگجوؤں کی نقل و حرکت کے بارے میں خاص اطلاع ملی۔ اس اطلاع پر کارروائی کرتے ہوئے بانڈی پورہ پولیس‘سی آر پی ایف اور ۱۳آر آر نے چیک چندرگیر حاجن پر مشترکہ ناکا لگایا۔
پیدل چلنے والوں اور گاڑیوں کی تلاشی لینے کے دوران ایک مشتبہ شخص نے ناکہ پارٹی کو دیکھ کر اپنی نقل و حرکت / شناخت چھپانے اور موقع سے فرار ہونے کی کوشش کی لیکن اسے حکمت کے ساتھ پکڑ لیا گیا۔
پولیس ترجمان نے مزید بتایا کہ اس کی ذاتی تلاشی لینے پر اس کے قبضے سے ایک ہینڈ گرینیڈ اور۳؍ اے کے۴۷ زندہ راؤنڈ برآمد ہوئے۔ گرفتار جنگجو نے اپنی شناخت معراج الدین راتھر عرف ابو حنظلہ ولد منظور احمد راتھر ساکن ایس کے بالا حاجن کے طور پر ظاہر کی۔
ابتدائی پوچھ گچھ کے دوران اس نے انکشاف کیا کہ وہ لشکر طیبہ کا ایک سرگرم رکن ہے اور ایک سال سے پاک ہینڈلر عرف بابر بھائی کی ہدایت پر کام کر رہا ہے اور اسے ضلع بانڈی پورہ بالخصوص حاجن کے علاقے میں مقامی عسکریت پسندی کو بحال کرنے کا کام سونپا گیا تھا۔
ضلع بانڈی پورہ میں سرگرم کوئی مقامی عسکریت پسند نہیں ہے۔ اسے سیکورٹی فورسز، غیر مقامی مزدوروں اورپنچایتی ممبر وں پر حملہ کرنے کا کام بھی سونپا گیا تھا۔ مزید یہ کہ اسے اس کے ہینڈلرز نے بانڈی پورہ ضلع کے مختلف علاقوں میں ملک مخالف پوسٹروں کو منظم کرنے اور چسپاں کرنے کی ہدایت بھی کی تھی تاکہ عام لوگوں کے ذہنوں میں خوف پیدا کیا جاسکے۔
یہ بات قابل ذکر ہے کہ پاک ہینڈلر عرف بابر بھائی نے انہیں مقامی نوجوانوں کو عسکریت پسندوں کی صفوں میں بھرتی کرنے کی ترغیب بھی دی تھی تاکہ علاقے میں امن و امان کو خراب کیا جا سکے۔