پوری نے پارلیمنٹ کی نئی عمارت کے تعمیراتی کام کا جائزہ لیا

نئی دہلی// مرکزی ہاؤسنگ اور شہری امور کے وزیر ہردیپ سنگھ پوری نے ہفتہ کو نئے پارلیمنٹ ہاؤس کے تعمیراتی کام کا جائزہ لیا۔
ٹویٹر پر زیر تعمیر عمارت کی کچھ تصاویرشیئر کرتے ہوئے مسٹر پوری نے کہا کہ‘عمارت کا تعمیراتی کام اچھی طرح سے جاری ہے ۔’ انہوں نے کہا کہ نیا پارلیمنٹ ہاؤس ایک ماحول دوست عمارت بن رہا ہے ۔ اس کے فن تعمیر کے کچھ حصے ہندوستان کے قدیم ثقافتی ورثے سے متاثر ہیں۔
مسٹر پوری نے اس زیر تعمیر عمارت کو "جدیدیت اور روایت کا سنگم” قرار دیا ہے ۔
حکام نے کچھ دن پہلے بتایا تھا کہ پارلیمنٹ کی نئی عمارت کی تعمیر میں چار ہزار سے زائد لوگ چوبیس گھنٹے کام کر رہے ہیں۔ اس کی تعمیر کا کام جلد مکمل ہونے کی امید ہے ۔
پرانے پارلیمنٹ ہاؤس کمپلیکس میں ہی بنائے جانے والے نئے پارلیمنٹ ہاؤس میں لوک سبھا ہال میں 888 اور راجیہ سبھا میں 384 سیٹوں کے لیے انتظامات کیے جا رہے ہیں۔ نئے پارلیمنٹ ہاؤس کے مشترکہ اجلاس کے لیے بنائے جانے والے ہال میں 1272 نشستوں کا انتظام ہوگا۔
نئی عمارت میں ممبران پارلیمنٹ کے لیے علیحدہ دفاتر، ڈیجیٹل سہولیات، ایک عظیم الشان آئینی ہال، ممبران پارلیمنٹ کے بیٹھنے کے لئے بڑا ہال، لائبریری، کمیٹیوں کے اجلاسوں کے لیے کئی چھوٹے کمرے ، کھانے کے کمرے اور پارکنگ کی سہولیات ہوں گی۔اس نئی عمارت کی تعمیری لاگت کا تخمینہ تقریباً 971 کروڑ روپے ہے ۔