نئی دہلی// الیکشن کمیشن نے اتر پردیش اور بہار سمیت پانچ ریاستوں کے پانچ اسمبلی حلقوں اور اتر پردیش کے مین پوری پارلیمانی حلقہ کے لیے 5 دسمبر کو ضمنی انتخابات کرانے کا اعلان کیا ہے ۔
مین پوری لوک سبھا حلقہ کے علاوہ اوڈیشہ کی پدم پور اسمبلی سیٹ، راجستھان میں سردارشہر، بہار میں کرہانی، چھتیس گڑھ میں بھانوپرتاپور (ایس ٹی) اور اتر پردیش کی رام پور اسمبلی سیٹ پر ضمنی انتخابات ہونے ہیں۔
ہفتہ کو جاری ہونے والے الیکشن کمیشن کے اعلامیے کے مطابق ضمنی انتخاب کا گیجٹ نوٹیفکیشن 10 نومبر کو جاری کیا جائے گا۔ کاغذات نامزدگی 17 نومبر تک داخل کیے جاسکتے ہیں۔ کاغذات نامزدگی کی جانچ پڑتال 18 نومبر کو ہوگی اور امیدوار 21 نومبر تک کاغذات نامزدگی واپس لے سکیں گے ۔
کمیشن نے ووٹنگ کی تاریخ 05 دسمبر مقرر کی ہے اور ووٹوں کی گنتی 08 دسمبر کو کی جائے گی، جس دن ہماچل پردیش اور گجرات اسمبلی انتخابات کے لیے ووٹوں کی گنتی ہونی ہے ۔ یہ ضمنی انتخابات 10 دسمبر 2022 تک مکمل ہوں گے ۔
کمیشن نے کہا ہے کہ ان اضلاع میں جہاں پورے ضلع میں یا کسی بھی پارلیمانی یا اسمبلی حلقے میں انتخابات ہونے جا رہے ہیں وہاں ماڈل ضابطہ اخلاق فوری طور پر نافذ ہو جائے گا۔