شملہ// مرکزی وزیرداخلہ امت شاہ نے کہا کہ کانگریس میں ‘ماں بیٹے ’ کے علاوہ کوئی اورنظرنہیں آتا ہے اوراس پارٹی نے ثقافتی ورثے کی توہین کی ہے ۔
منڈی ضلع کے کرسوگ میں منگل کو ایک انتخابی ریلی سے خطاب کرتے ہوئے مسٹر شاہ نے کہا، ‘‘ہم نے وعدہ کیا تھا کہ اگر ہم آئیں گے تو ہماچل کو ترقی کی راہ پر لے جائیں گے ۔ آج ہماچل میں سڑکیں، اسپتال، پانی کا نظام، تمام بنیادی سہولتیں لوگوں تک پہنچ رہی ہیں۔ وزیر اعظم نریندر مودی کوآپ نے ہماچل کی تمام سیٹیں دیں، انہیں دوبارہ وزیر اعظم بنایا۔
مسٹر شاہ نے کہا، "کانگریس پارٹی میں ماں بیٹے کے علاوہ کوئی اور نظرنہیں آتا۔ جب صرف ماں بیٹے کو ہی پارٹی چلانی ہے تو میرے نوجوان دوستوآپ کی جگہ کہاں رہے گی؟ بھارتیہ جنتا پارٹی کی حکمرانی ملک اور دنیا میں عزت بڑھانے کے لئے ہے ۔ ملک کے غریبوں کا معیار زندگی بلند کرنے کے لئے ہے ۔ ہندوستان کے غرور کو بڑھانے اورترقی کرنے کے لئے ہے ۔
انہوں نے کہا، "جوان ‘ون رینک ون پنشن’ کا مطالبہ کرتے تھے ، کانگریس حکومت یہ پورا نہیں کرتی تھی، اس لیے 2014 میں وزیر اعظم بننے کے بعد مسٹرنریندر مودی نے ‘ون رینک ون پینشن’ کو نافذ کرکے 40 سال پرانے مسئلے کو ختم کر دیا۔ کورونا کے دوران ملک کے 80 کروڑ لوگوں کو فی شخص ماہانہ مفت راشن دینے کا کام مسٹرمودی نے کیا ہے ۔ 80 کروڑ لوگوں کو راشن پہنچانے والی دنیا میں اگر کوئی حکومت ہے تو وہ بی جے پی حکومت ہے ۔ ہماچل کانگریس کے لیے سیاحتی مقام ہے ۔ مسٹرمودی کے لیے ہماچل کرم بھومی ہے ۔
مرکزی وزیر داخلہ نے کہا کہ کانگریس بابا صاحب بھیم راؤ امبیڈکر کا نام لیتی ہے ، لیکن ساری زندگی انہیں پریشان کرنے کا کام کیا۔ بی جے پی نے 14 اپریل کو قومی ہم آہنگی کا دن اور 20 نومبر کو یوم دستور بنایا۔ انہوں نے کہا کہ مہو، لندن، ناگپور، دہلی اور ممبئی میں ڈاکٹر امبیڈکر کی یادگاریں بنانے کا کام بی جے پی حکومت نے کیا۔ بی جے پی نے اتراکھنڈ میں رواج توڑا ہے ، اس بار ہماچل میں بھی رسم ٹوٹنے والی ہے ۔