پرتھ//
پاکستانی ٹیم کے وکٹ کیپر بلے باز محمد رضوان نے کم ترین اننگز میں 2500 ٹی ٹونٹی رنز مکمل کرنے کا سابق بھارتی کپتان ویرات کوہلی کا ریکارڈ توڑ دیا ہے۔ 30 سالہ محمد رضوان نے ٹی ٹونٹی ورلڈ کپ 2022ء میں نیدرلینڈ کیخلاف 49 رنز کی اننگز کھیل کر 65ویں ٹی ٹونٹی اننگز میں اپنے 2500 رنز مکمل کیے جس کے بعد وہ تیز ترین 2500 رنز مکمل کرنے والے دنیا کے دوسرے بلے باز بن گئے ۔
پاکستانی ٹیم کے کپتان بابر اعظم 62 اننگز میں 2500 ٹی ٹونٹی رنز مکمل کرکے اس فہرست میں پہلے نمبر پر ہیں جب کہ ویرات کوہلی 68 اننگز میں یہ اعزاز حاصل کرکے تیسری پوزیشن پر براجمان ہیں ۔ اس سے قبل ٹی20 ورلڈکپ کے سپر 12 مرحلے کے 17 ویں میچ میں پاکستان نے نیدر لینڈز کو 6 وکٹوں سے شکست دیدی ہے۔
پرتھ کرکٹ گراؤنڈ میں کھیلے جارہے میچ میں نیدر لینڈز کے کپتان نے ٹاس جیت کر پہلے بیٹنگ کرنے کا فیصلہ کیا۔
شاہین شاہ آفریدی نے اننگز کے تیسرے اوور میں اسٹیفن مے برگ کو 6 رنز پر کیچ آؤٹ کرایا۔ اننگز کے 7ویں اوور میں 19 کے مجموعی سکور پر شاداب خان نے پاکستان کو دوسری کامیابی دلوائی جب انہوں نے ٹام کوپر کو ایک رن پر آؤٹ کیا۔ نیدرلینڈز کی تیسری وکٹ 26 رنز پر گری، اس مرتبہ بھی شاداب خان نے وکٹ حاصل کی، انہوں نے میکس اوڈوڈ کو 8 رنز پر پولین بھیجا۔
شاداب خان نے بولنگ میں شاندار کارکردگی جاری رکھتے ہوئے پاکستان کے لیے چوتھی وکٹ بھی حاصل کی۔ انہوں نے 15 ویں اوور میں نیدرلینڈز کے 61 کے اسکور پر کولن ایکرمین کو آؤٹ کیا۔ اگلے اوور میں نسیم شاہ نے نیدرلینڈز کے کپتان کو 15 رنز پر آؤٹ کیا جبکہ 17 ویں اوور میں حارث رؤف نے اگلے بیٹر کو بولڈ کیا۔ محمد وسیم نے اننگز کے 19ویں اوور میں نیدرلینڈز کے لگاتار 2 بیٹرز کو بولڈ کیا۔
پاکستان کی جانب سے شاہین شاہ آفریدی، حارث رؤف اورنسیم شاہ نے ایک ایک، وسیم جونیئر نے دو جب کہ شاداب خان نے 3 وکٹیں حاصل کیں۔ ہدف کے تعاقب میں کپتان بابر اعظم اور محمد رضوان نے اننگز کا آغاز کیا اور یہ پارٹنرشپ صرف 2 اوورز ہی قائم رہی۔ دوسرے اوور کی آخری گیند پر بابر اعظم 4 رنز بنا کر رن آؤٹ ہوگئے۔ پاکستان کی دوسری وکٹ 53 کے مجموعی اسکور پر 8 ویں اوور میں گری جب فخر زمان 20 رنز بنا کر آؤٹ ہوئے۔
اوپنر محمد رضوان 49 بناکر وکٹ گنوابیٹھے۔ میچ کے اختتامی لمحات میں قومی کرکٹرز نے رن ریٹ بہتر کرنے کے بجائے سنگل ڈبل پر فوکس کیا، شان مسعود نے 16 گیندوں پر 12 جبکہ افتخار احمد نے 5 رنز اسکور کیے۔ نیدر لینڈز کی جانب سے برینڈن گلوور نے دو جبکہ پال وین میکرین نے ایک وکٹ حاصل کی۔