سوریاکمار کو آؤٹ کرنے پر وین پارنیل کا رونالڈو کے انداز میں جشن، ویڈیو وائرل

پرتھ//
پرتھ سے جنوبی افریقہ اور بھارت کے درمیان گزشتہ روز ہونے والے میچ کے دوران وین پارنیل کی بھارتی بیٹسمین سوریا کمار یادو کو آؤٹ کرنے کے بعد کرسٹیانو رنالڈو کے انداز میں جشن مناتے ہوئے ویڈیو سوشل میڈیا پر وائرل ہوگئی ہے۔
آخری اوورز میں جب بھارتی بیٹسمین سوریا کمار کے پاس اسکور بورڈ پر ایک بڑا ٹوٹل ریکارڈ کرنے کا موقع تھا لیکن 19ویں اوور میں جنوبی افریقہ کے وین پارنیل کے ہاتھوں آؤٹ ہوگئےتھے۔
جیسے ہی وین پارنیل نے سوریا کمار کو آؤٹ کیا تو اس موقع پر جشن منانے کے لیے رونالڈو کےمشہور انداز کو کاپی کیا۔
وین پارنیل کے جشن منانے کا یہ انداز سوشل میڈیا پر وائرل ہوگیا ہے اور سوشل میڈیا صارفین کی جانب سے اس پر دلچسپ تبصرے کیے جارہے ہیں۔
واضح رہے کہ سوریا کمار یادو نے اپنی شاندار بیٹنگ سے گزشتہ روز جنوبی افریقہ کے خلاف 40 گیندوں پر 68 رنز بنا کر بھارتی ٹیم کو 133 رنز بنانے میں مدد کی۔
البتہ، جنوبی افریقہ نے ایڈن مارکرم اور ڈیوڈ ملر کی شاندار نصف سنچریوں کی مدد سے بھارت کی جانب سے دیے گئے ہدف کا تعاقب کرلیا۔