عشق اندھا کردیتا ہے…اتنا کہ پھر کچھ بھی نہیں دکھائی دیتا ہے… اپنے عاشق اور معشوقہ کے علاوہ…کوئی خامی ‘ کوئی نقص کچھ دکھائی نہیں دیتا ہے …ہم مانتے ہیں کہ پاکستانیوں … عام پاکستانیوں کو بھی عشق ہو اہے … پہلی بار ہم دیکھ رہے ہیں کہ پاکستانیوں کو بہ حیثیت قوم کسی ایک سے عشق ہوا ہے… اتنا عشق کہ اللہ میاں کی قسم یہ قوم اس عشق میں اندھی ہو گئی ہے…اتنی اندھی کہ اسے خان صاحب… عمران خاں صاحب کی کوئی خامی ‘ کوئی نقص دکھائی نہیں دے رہی ہے… آپ ثبوت بھی دکھائے ‘ آپ ثابت بھی کیجئے کہ خان صاحب نے محض اقتدار کیلئے‘ اقتدار کو دوام بخشنے کیلئے اپنے ملک کا بیڑا غرق کردیا … کوئی آپ کی بات پر بھروسہ کرنے کیلئے تیار نہیںہوگا… خان صاحب کے دور حکومت میں عام پاکستانی پس گئے ‘ مہنگائی نے ان کی کمر توڑ ڈالی … بے روز گاری نے ان کا جینا محال کردیا … خان صاحب کی انا کی وجہ سے پاکستان کو عالمی تنہائی کا سامنا رہا … یہ ملک قرضوں میں مزید ڈوب گیا ‘ آئی ایم ایف کے ہاں اس نے ملک کے مرکزی بینک کو گروی رکھا ‘ اس کی خودمختاری کو بیچ ڈالا … ہمسایہ ملکوں ‘ خاص کر بھارت کے ساتھ تعلقات کو نچلی ترین سطح پر لاکھڑا کیا … جھوٹ بول بول کر‘ اپنی حکومت کیخلاف’سازش‘ کا بیانیہ اختراع کرکے اپنے ملک کے عزت و وقار کو نیلام کردیا … اور بھی بہت کچھ کردیا … جو آہستہ آہستہ اب سامنے آرہا ہے… لیکن… لیکن پھر بھی ‘ اس سب کے باوجودبھی پاکستانی … عام پاکستانیوں کے سروں سے خان صاحب کا بھوت نہیں اتر رہا ہے اور… اور بالکل بھی نہیں اتر رہا ہے…اور ضمنی انتخابات میں ۹ میں سے ۶ قومی اسمبلی کی نشستیں خان صاحب کی جھولی میں ڈال دی ۔ہم نہیں جانتے ہیں کہ یہ پاکستان کی بد قسمتی ہے یا خان صاحب کی خوش قسمتی … ہم نہیں جانتے ہیں… کہ…کہ اگر ہم کچھ جانتے ہیں تو… تو یہ ایک بات جانتے ہیں کہ یہ جو عشق ہے یہ انسان کو اندھا کردیتا ہے‘ اسے نکمابنا دیتا ہے اور… اور ہم یہ بات وثوق سے کہہ رہے ہیں کہ … کہ پاکستان کی قوم خان صاحب کے عشق میں اندھی ہو گئی ہے اور… اور نکمی بھی ‘جسے خان صاحب کے بغیر کوئی اور نکما نہیں دکھ رہاہے … اور بالکل بھی نہیں دکھ رہا ہے ۔گرچہ پاکستان نکموں سے بھرا پڑا ہے… قسم شریفوں اور زرداریوں کی ہے نا؟
