سرینگر//
جموں کشمیر پولیس نے تین لوگوں کی گرفتاری عمل لائی ہے‘ جنہوں نے جنسی زیاتی کا الزام لگا کر لوگوں کو بلیک میل کرکے ۶ ماہ میں ۴۰لاکھ روپے کمائے ۔
پولیس نے بتایا کہ اس ہفتے کے شروع میں ایک سینئر سرکاری اہلکار نے پولیس کے پاس جا کر شکایت کی کہ اسے ۸ لاکھ روپے کا دھوکہ دیا گیا ہے اور اسے بلیک میل کیا جا رہا ہے۔
تینوں مشتبہ افراد، شائستہ بشیر اور ان کے شوہر اعزاز احمد گنائی اور ان کے دوست جہانگیر احمد ڈار کو بدھ کے روز ’بھتہ خوری‘ کا مکمل ریکیٹ چلانے کے الزام میں گرفتار کیا تھا۔
لیس نے ایک بیان میں کہا کہ شائستہ بشیر، ان کے خاوند جو بڈگام کے نارکرہ علاقے میں رہائش پذیر ہیں اور ان کا ساتھی جہانگیر احمد ڈار ساکن ہندواڑہ نے ضلع بڈگام کے ڈلون گاؤں کے باشندے نذیر احمد راتھر کو جنسی زیادتی کے فریب میں ڈال کر ان سے پیسے وصولے۔
پولیس کا کہنا ہے کہ نذیر احمد نے شیر گڑی پولیس تھانے میں شائستہ اور دو ملزمان کے خلاف شکایت درج کروائی کہ شائستہ نے ان کو فون کال کرکے کسی کام کے مقصد سے سرینگر بلایا۔ شکایت کنندہ گان نے پولیس کو بتایا کہ شائستہ نے ان کو بٹہ مالو میں ایک کمرے میں لے گئی جہاں جنسی زیادتی کے الزام میں اس کے خاوند اعجاز احمد اور جہانگیر احمد نے نزیر احمد کا ویڈیو بنایا اور شکایت کنندگان کو بدنام کرنے کی دھمکی دے کر ان سے پیسے وصولے۔ پولیس کا کہنا ہے کہ شکایت کنند گان اس فریب میں آکر ان کو پیسے دیے اور ان کی سازش میں پھنس گئے۔
پولیس نے کہا کہ ابتدائی تحقیقات کے بعد مذکورہ ملزمین کو گرفتار کر لیا گیا ہے اور ان کے انکشاف سے مزید گرفتاریاں کی جائیں گی۔ پولیس کے مطابق مذکورہ ملزمان دیگر افراد کے ساتھ بڑی گینگ چلا رہے تھے جس کا پردہ فاش کیا گیا ہے۔ پولیس کا کہنا ہے کہ اس معاملے کی مزید تحقیقات کا آغاز کیا گیا ہے۔
پولیس کے مطابق یہ گینگ بااثر افراد کے بارے میں معلومات اکٹھا کرتا تھا اور گزشتہ چھ ماہ میں بلیک میل کر کے تقریباً ۴۰ لاکھ روپے کما چکا تھا۔
ایس ایس پی سرینگر‘ راکیش بلوال نے پی ٹی آئی کو بتایا’’تقریباً سات سے آٹھ ایسے افراد ہماری نوٹس میں آئے ہیں اور ہم اس پر کام کر رہے ہیں‘‘۔
بلوال کاکہنا تھا’’مجھے یقین ہے کہ ان جیسے اور بھی بہت سے مرد ہوں گے جو سماجی بدنامی کی وجہ سے خاموش ہیں۔ میں انہیں یقین دلاتا ہوں کہ ان کی شناخت کا خیال رکھا جائے گا۔‘‘
پولیس حکام نے بتایا کہ گرفتار کیے گئے تین افراد کے خلاف بھتہ خوری، مشترکہ نیت سے کیے گئے جرم، مجرمانہ سازش اور مجرمانہ دھمکیاں دینے کا مقدمہ درج کیا گیا ہے۔