اسلامی دنیا کے معروف عالم علامہ یوسف القرضاوی کا انتقال

سرینگر//(ویب ڈیسک)
قطر میں مقیم ممتاز مصری نڑاد عالم دین علامہ یوسف القرضاوی انتقال کر گئے ہیں۔ان کی عمر۹۶ برس تھی۔
ان کے بیٹے عبدالرحمٰن یوسف القرضاوی نے اپنے ٹویٹراکاؤنٹ پروالد کی وفات کی تصدیق کی ہے۔
قرضاوی۲۰۱۳ میں آبائی وطن مصر سے نقل مکانی کے بعد قطر میں جلاوطنی کی زندگی گزاررہے تھے جہاں گذشتہ برسوں میں قطرنے انھیں شہریت دے دی تھی۔
۲۰۱۵ میں مصر میں ان کی عدم موجودگی میں ان کے خلاف مقدمہ چلایا گیا تھا اورعدالت نے انھیں کالعدم مذہبی سیاسی جماعت الاخوان المسلمون سے تعلق کے الزام میں سزائے موت سنائی تھی۔انھیں الاخوان کا روحانی پیشوا خیال کیا جاتا تھا۔
قرضاوی ۲۰۰۴ سے قائم مسلم اسکالرزکی بین الاقوامی یونین کے چیئرمین بھی تھے اور ۱۴ سال تک اس عہدے پر فائز رہے تھے۔وہ کئی بلندپایہ کتب کے مصنف تھے اور دنیا کے مختلف ملکوں میں ان کے پیروکاروں اور شاگردوں کی کثیر تعداد ہے۔