ہندوستان مسلسل چوتھی ون ڈے سیریز جیتنے کے لیے میدان میں اترے گا

ہرارے// ہندوستانی کرکٹ ٹیم لگاتار چوتھی ون ڈے سیریز جیتنے کی کوشش میں ہفتہ کو زمبابوے کے خلاف اپنا دوسرا ون ڈے کھیلے گی۔ ہندوستان اس وقت تین میچوں کی سیریز میں 1-0 کی برتری پر ہے اور اگر وہ میچ جیت جاتا ہے تو اسے 2-0 کی ناقابل تسخیر برتری حاصل ہوگی۔ یہ کے ایل راہل کی بطور کپتان پہلی فاتح سیریز بھی ہوگی۔
تقریباً تین ماہ بعد میدان میں واپس آنے والے راہل بھی اس میچ میں اوپننگ کر سکتے ہیں۔ انہیں گزشتہ میچ میں چوتھی پوزیشن پر بیٹنگ کرنا تھی لیکن 189 رنز کا ہدف شیکھر دھون اور شبھمن گل کی جوڑی نے حاصل کر لیا جس کی وجہ سے انہیں بیٹنگ کا موقع نہیں ملا۔ اگست کے آخر میں ہونے والے ایشیا کپ سے پہلے راہل وکٹ پر وقت گزارنے کے لیے پہلے نمبر پر بلے بازی کر سکتے ہیں۔
دوسری جانب اگر شبھمن گل کو اننگز کا آغاز کرنے کا موقع ملا تو وہ اس جگہ کو اپنا بنانا چاہیں گے۔ گل، اپنی پچھلی چار اننگز میں اوپننگ کرتے ہوئے 64، 43، 98 اور 82 کے اسکور کئے تھے اور وہ مستقبل میں ہندوستان کے مستقل اوپنر بننے کے مضبوط دعویدار ہیں۔
ہندوستان کے حریف زمبابوے کو ان سے بہتر ٹیم کے خلاف اچھی کارکردگی دکھانے کے لیے بیٹنگ کے کچھ مسائل حل کرنے ہوں گے۔ اس سیریز میں آنے سے قبل زمبابوے نے بنگلہ دیش کو ٹی ٹوئنٹی اور ون ڈے سیریز میں شکست دی تھی لیکن ہندوستان کے خلاف پہلے میچ میں ٹیم کا رنگ پھیکا نظر آیا۔
بنگلہ دیش کے خلاف پہلے ون ڈے میں سنچریاں بنانے والے انوسینٹ کائیا، تادیواناشے مارومانی، ویسلے مادھویرے اور تکودزواناشے کیتانو کو مڈل آرڈر بلے بازوں کے لیے اسٹیج سیٹ کرنے کے لیے پچ پر وقت گزارنا ہوگا۔ ٹیم کو سکندر رضا اور ریان برلے سے بھی خصوصی امیدیں ہوں گی۔
دیپک چاہر، محمد سراج اور پرسدھ کرشنا کے خلاف زمبابوے کی ذہنیت ان کے لیے فیصلہ کن ثابت ہوگی۔