پرینکا نے احتجاج کی قیادت کی، پولیس نے حراست میں لے لیا

نئی دہلی// کانگریس کے لیڈروں اور کارکنوں نے جنرل سکریٹری پرینکا گاندھی واڈرا کی قیادت میں جمعہ کو یہاں پارٹی ہیڈکوارٹر پر مہنگائی اور گڈس اینڈ سروس ٹیکس (جی ایس ٹی) میں اضافہ کو لے کر مرکزی حکومت کے خلاف شدید احتجاج کیا۔ جنہیں بعد میں پولیس نے حراست میں لے لیا۔
مہنگائی اور بے روزگاری کے خلاف کانگریس ملک گیر احتجاج کر رہی ہے ۔ پارلیمنٹ ہاؤس میں ایک مارچ بھی نکالا گیا جہاں کانگریس کے سابق صدر راہل گاندھی سمیت کئی لیڈروں کو حراست میں لیا گیا۔
کئی کانگریسی کارکنان صبح سے ہی پارٹی دفتر میں جمع ہوئے اور مہنگائی، جی ایس ٹی کو لے کر حکومت کے خلاف نعرے بازی کی۔
مسز واڈرا نے پارٹی لیڈر ہریش راوت اور دیگر کے ساتھ مل کر ایک گاڑی میں گیس سلنڈر ڈال کر وزیر اعظم نریندر مودی کی رہائش گاہ تک مارچ نکالنے کا منصوبہ بنایا۔
جیسے ہی کانگریس ارکان نے پہلے پولیس کی رکاوٹ کو توڑا، انہیں سیکورٹی اہلکاروں نے روک دیا۔ پارٹی جنرل سکریٹری نے پارٹی دفتر کے باہر دھرنا دیا جس کے بعد پولیس نے انہیں حراست میں لے لیا۔