امسال پہلے۱۰ماہ میں۴لاکھ۹۱ہزار سیاحوں کی آمد:ایل جی
(ایجنسیاں )
لیہہ/جموں؍۱۳ نومبر
لداخ میں سیاحوں کی آمد میں نمایاں اضافہ ریکارڈ کیا گیا ہے۔ لیفٹیننٹ گورنر ونے کمار سکسینہ نے جمعہ کو بتایا کہ سال۲۰۲۶ کے پہلے دس مہینوں کے دوران گزشتہ سال کے اسی عرصے کے مقابلے میں سیاحوں کی تعداد میں۶۵ء۹۰ فیصد اضافہ ہوا ہے۔
سوشل میڈیا پلیٹ فارم ایکس پر ایک پوسٹ میں لیفٹیننٹ گورنر نے کہا کہ جنوری سے اکتوبر۲۰۲۶کے دوران لداخ میں مجموعی طور پر۴ء۹۱ لاکھ سیاح پہنچے، جبکہ گزشتہ سال اسی عرصے میں یہ تعداد۲ء۹۶ لاکھ تھی۔
انہوں نے کہا کہ رواں سال مسلسل چھٹے مہینے بھی لداخ میں سیاحت کے شعبے میں غیر معمولی اضافہ درج کیا گیا۔ ان کے مطابق مئی میں سیاحوں کی آمد میں۱۲۱ فیصد، جون میں۴۳ فیصد، جولائی میں۵۶ فیصد، اگست میں۶۵ فیصد اور ستمبر میں۶۱ فیصد اضافہ ریکارڈ کیا گیا۔
لیفٹیننٹ گورنر نے بتایا کہ اکتوبر میں بھی سیاحوں کی آمد میں اضافے کا سلسلہ برقرار رہا۔ اس ماہ۳۰ہزار۶۲۳ سیاح لداخ پہنچے، جبکہ گزشتہ سال اکتوبر میں یہ تعداد۱۷ہزار۵۳۷ تھی۔ اس طرح اکتوبر میں سیاحوں کی آمد میں۷۲ء۶۲ فیصد اضافہ درج کیا گیا۔
سکسینہ نے سیاحوں کی بڑھتی ہوئی تعداد کا سہرا وزیر اعظم نریندر مودی کی جانب سے ملکی سیاحت کو فروغ دینے کی اپیل اور ان کی انتظامیہ کی جانب سے مقامی سیاحتی صنعت کو مضبوط بنانے کے لیے اٹھائے گئے پالیسی اقدامات کو دیا۔
انہوں نے کہا کہ سیاحوں کی آمد میں اضافے سے روزگار کے نئے مواقع پیدا ہو رہے ہیں اور مقامی آبادی کے لیے پائیدار ذرائع معاش کو بھی تقویت مل رہی ہے۔
لیفٹیننٹ گورنر نے اپنی پوسٹ میں سیاحوں کا خیرمقدم کرتے ہوئے کہا کہ لداخ آنے والے مسافر اس خطے کے دلکش قدرتی حسن اور مالا مال ثقافت سے لطف اندوز ہونے کے ساتھ ذمہ دارانہ سیاحت کو بھی فروغ دیں
