(ایجنسیاں )
راجوری؍۱۳ نومبر
جموں و کشمیر پولیس نے ضلع راجوری کے تھنہ منڈی علاقے کے گاؤں کھبلان میں پاکستان میں مقیم ایک مبینہ دہشت گرد ہینڈلر کی تقریباً۸۱ لاکھ روپے مالیت کی غیر منقولہ جائیداد قرق کر دی ہے۔
پولیس کے مطابق قرق کی گئی جائیداد میں۲ کنال اور۴ مرلہ اراضی شامل ہے، جو محمد ارشد کی ملکیت ہے۔ بتایا جاتا ہے کہ محمد ارشد تقریباً۱۵ سال قبل پاکستان کے زیر انتظام کشمیر چلا گیا تھا۔
پولیس حکام کے مطابق یہ کارروائی۲۰۱۱ میں درج ایک مقدمے کے سلسلے میں متعلقہ قانونی دفعات کے تحت انجام دی گئی ہے۔
پولیس اہلکاروں نے گاؤں کھبلان میں موقع پر پہنچ کر جائیداد قرق کرنے کی کارروائی مکمل کی اور وہاں باضابطہ نوٹس بھی چسپاں کر دیا، جس کے تحت مذکورہ جائیداد پر قانونی پابندیاں عائد کر دی گئی ہیں۔
۔۔۔۔۔۔
