سرینگر؍۹نومبر
موں و کشمیر بورڈ آف اسکول ایجوکیشن (جے کے بورڈ) نے دسویں، گیارہویں اور بارہویں جماعت کے امتحانی نتائج۱۰ جنوری تک جاری کرنے کا ہدف مقرر کیا ہے۔
جے کے بورڈ کے چیئرمین غلام حسن شیخ نے کہا کہ جاری امتحانات کی تکمیل کے بعد مقررہ مدت کے اندر نتائج کا اعلان کرنے کی کوشش کی جا رہی ہے۔
ایک تقریب کے موقع پر صحافیوں سے گفتگو کرتے ہوئے شیخ نے کہا کہ آخری پرچے کے بعد عملی امتحانات اور پیشہ ورانہ مضامین کے امتحانات منعقد کرنے میں تقریباً۸ سے۱۰ دن لگتے ہیں۔ انہوں نے کہا کہ بورڈ کی کوشش ہوگی کہ۱۰ جنوری تک تمام جماعتوں کے نتائج جاری کر دیے جائیں۔
تاہم انہوں نے واضح کیا کہ بعض عوامل نتائج کے اعلان کے مقررہ وقت پر اثر انداز ہو سکتے ہیں، اس لیے نتائج کی تاریخ کے حوالے سے سو فیصد یقین دہانی نہیں کرائی جا سکتی۔
جاری امتحانات کے بارے میں چیئرمین نے کہا کہ دسویں جماعت کے اہم مضامین کے پرچے مکمل ہو چکے ہیں، جبکہ صرف چند اضافی اور پیشہ ورانہ مضامین کے امتحانات باقی ہیں۔ بارہویں جماعت کے بھی بیشتر اہم مضامین کے پرچے منعقد ہو چکے ہیں، جبکہ گیارہویں جماعت کے امتحانات جاری ہیں اور ہر شعبے کے تین تین پرچے مکمل ہو چکے ہیں۔
شیخ نے کہا کہ امتحانات خوش اسلوبی سے جاری ہیں۔
چیئرمین جے کے بورڈ غلام حسن شیخ نے مزید بتایا کہ سرکاری اسکولوں میں پہلی سے آٹھویں جماعت تک کے طلبہ میں مفت درسی کتابوں کی تقسیم کا عمل تعلیمی سیشن کے آغاز کے ساتھ ہی شروع کر دیا گیا ہے۔ ان کے مطابق کئی برسوں بعد پہلی مرتبہ کتابوں کی تقسیم کا عمل بروقت شروع کیا گیا ہے۔
شیخ نے کہا کہ وادی کشمیر کے تمام علاقوں میں آئندہ ۸ سے ۱۰ دنوں کے اندر کتابوں کی تقسیم مکمل کر لی جائے گی۔ اس سلسلے میں کتابیں زونل ایجوکیشن افسران کو فراہم کی جا رہی ہیں تاکہ وہ انہیں متعلقہ اسکولوں تک پہنچا سکیں۔
چیئرمین کے مطابق جموں و کشمیر کے سرکاری اسکولوں میں زیر تعلیم تقریباً۸ء۲ لاکھ طلبہ مفت درسی کتابوں کی اسکیم کے دائرے میں آتے ہیں، جن میں تقریباً۳ء۳۱ لاکھ طلبہ وادی کشمیر سے تعلق رکھتے ہیں۔
۔۔۔۔۔(ویب ڈیسک)
