’میک اِن انڈیا‘ کے 12 سال: مودی نے پیداوار، سرمایہ کاری اور برآمدات بڑھانے پر زور دیا

نئی دہلی، 25 ستمبر (یو این آئی) وزیر اعظم نریندر مودی نے جمعہ کو ’میک اِن انڈیا‘ پہل کے 12 سال مکمل ہونے پر مختلف شعبوں میں ہونے والی نمایاں تبدیلیوں کا ذکر کرتے ہوئے کہا کہ اس پہل کے ذریعے ملک کی اقتصادی تبدیلی کے اہم اشاریوں کے طور پر گھریلو پیداوار، سرمایہ کاری اور برآمدات میں اضافہ ہوا ہے۔
مسٹر مودی نے سوشل میڈیا پلیٹ فارم ’ایکس‘ پر ایک پوسٹ میں کہا، ’’ملک میں زیادہ پیداوار۔ ملک میں زیادہ سرمایہ کاری۔ ہر شعبے میں واضح تبدیلی!‘‘
ایک اور پوسٹ میں وزیر اعظم نے ایک ویڈیو شیئر کی، جس میں ’میک اِن انڈیا‘ کی کامیابیوں کی جھلک دکھائی گئی ہے۔ اس کے ساتھ انہوں نے لکھا کہ میک اِن انڈیا کے ذریعے بنیادی ڈھانچہ، کاروباری سرگرمیاں اور اختراعات فروغ پا رہی ہیں، جو ملک کی ترقی اور خوشحالی میں اپنا کردار ادا کر رہی ہیں۔
ستمبر 2014 میں شروع کی گئی ’میک اِن انڈیا‘ پہل کا مقصد ملک کو عالمی پیداواری مرکز کے طور پر فروغ دینا، ملکی اور غیر ملکی سرمایہ کاری کو راغب کرنا، اختراعات کو فروغ دینا اور روزگار کے مواقع پیدا کرنا تھا۔
اس کے تحت حکومت نے الیکٹرانکس، گاڑیوں، دفاع، ادویہ سازی اور قابل تجدید توانائی جیسے شعبوں میں پیداواری صلاحیت کو مضبوط بنانے کی کوشش کی ہے۔ اس کے ساتھ ہی ملکی صنعت کو عالمی رسدی سلسلے سے مزید مضبوطی کے ساتھ جوڑا گیا ہے۔ گھریلو پیداوار کو فروغ دینے اور سرمایہ کاری کو راغب کرنے کے لیے کچھ مخصوص شعبوں کے لیے پیداوار سے منسلک ترغیبی اسکیموں سمیت مختلف پالیسی اقدامات بھی شروع کیے گئے ہیں۔
موجودہ جغرافیائی سیاسی حالات میں رسدی سلسلے میں پیدا ہونے والی رکاوٹوں کے بعد ’میک اِن انڈیا‘ کی اہمیت مزید بڑھ گئی ہے۔