سرینگر/۷ستمبر
اینٹی کرپشن بیورو (اے سی بی) نے پیر کو سری نگر کے بٹہ مالو علاقے میں ریونیو ایکسٹریکٹ جاری کرنے کے عوض ایک پٹواری کی جانب سے مبینہ طور پر۱۱ ہزار روپے رشوت وصول کرتے ہوئے ایک لینڈ بروکر کو رنگے ہاتھوں گرفتار کرلیا۔
اے سی بی کے ترجمان نے ایک بیان میں بتایا کہ بیورو کو ایک تحریری شکایت موصول ہوئی تھی، جس میں الزام عائد کیا گیا تھا کہ حلقہ بٹ مالو، سری نگر کے پٹواری سلیم الطاف نے اپنے ساتھی عبد الحمید خان، جو لینڈ بروکر/دلال کے طور پر کام کرتا ہے، کے ذریعے شکایت کنندہ سے اس کے مکان سے متعلق ریونیو ایکسٹریکٹ جاری کرنے کے لیے غیر قانونی رقم کا مطالبہ کیا۔
ترجمان کے مطابق شکایت کنندہ نے اپنے والد کی جانب سے میوٹیشن کی تصدیق کے مقصد سے ریونیو ایکسٹریکٹ کے لیے آن لائن درخواست دی تھی۔ الزام ہے کہ پٹواری نے اپنے ساتھی کے ذریعے ابتدا میں۲۰ ہزار روپے کا مطالبہ کیا، جو بعد میں۱۶ ہزار روپے میں طے ہوا۔
شکایت کنندہ نے مزید الزام لگایا کہ مذکورہ دلال نے پٹواری کی جانب سے پہلے ہی۵ ہزار روپے کی پہلی قسط وصول کرلی تھی، جبکہ ریونیو ایکسٹریکٹ جاری کرنے کے لیے پیر کو مزید۱۱ ہزار روپے کا مطالبہ کیا گیا۔
اے سی بی ترجمان نے بتایا کہ شکایت موصول ہونے کے بعد الزامات کی تصدیق کی گئی اور اس سلسلے میں ایک ایف آئی آر متعلقہ دفعات کے تحت پولیس اسٹیشن اے سی بی سری نگر میں مقدمہ درج کرکے تحقیقات شروع کی گئی۔
تحقیقات کے دوران اے سی بی سری نگر نے ایک ٹریپ ٹیم تشکیل دی۔ کارروائی کے دوران عبد الحمید خان کو۱۱ ہزار روپے کی مبینہ رشوت کا مطالبہ اور وصولی کرتے ہوئے رنگے ہاتھوں گرفتار کرلیا گیا۔ الزام ہے کہ وہ یہ رقم پٹواری سلیم الطاف کی جانب سے وصول کر رہا تھا۔
ملزم دلال کو حراست میں لے لیا گیا۔ اس کی ذاتی تلاشی کے دوران ٹریپ کی رقم۱۱ ہزار روپے کے علاوہ۲۵ہزار۱۲۵ روپے نقد، ادائیگی کی رسیدیں، متعلقہ ریونیو ایکسٹریکٹ اور محمد صدیق شیخ ولد غلام محمد شیخ سے متعلق ایک سیل ڈیڈ بھی برآمد ہوئی۔
اے سی بی نے برآمد شدہ اشیا کو ضابطے کے مطابق اپنی تحویل میں لے لیا ہے اور ان کا جائزہ تحقیقات کے حصے کے طور پر لیا جا رہا ہے۔
اے سی بی کے مطابق دلال عبد الحمید خان کے ذریعے رشوت کے مطالبے اور وصولی میں پٹواری سلیم الطاف کے ملوث ہونے کے الزام کی مزید تحقیقات کی جا رہی ہیں۔ معاملے میں تفتیش جاری ہے۔
۔۔۔۔۔۔(ایجنسیاں )
