یوپی ٹی20 لیگ کے چوتھے سیزن کا آغاز، 150 ممالک میں براہ راست نشریات

لکھنؤ، 14 اگست (یواین آئی) اترپردیش کی معروف یوپی ٹی20 لیگ کے چوتھے سیزن کا آغاز جمعہ سے ہوگا۔ اس بار ٹورنامنٹ کے مقابلے لکھنؤ کے بھارت رتن اٹل بہاری واجپئی اکانا اسٹیڈیم اور کانپور کے گرین پارک اسٹیڈیم میں کھیلے جائیں گے۔ لیگ کے مقابلوں کی براہ راست نشریات 150 ممالک میں کی جائیں گی، جبکہ ہندوستان میں کرکٹ شائقین اسے جیو ہاٹ اسٹار اور اسٹار اسپورٹس-2 پر دیکھ سکیں گے۔
ٹورنامنٹ کے آغاز سے قبل منعقدہ ’کپتانوں کی میٹنگ‘ اور پریس کانفرنس میں لیگ کے چیئرمین ڈاکٹر سنجے کپور نے کہا کہ یوپی ٹی20 لیگ اب ریاست کے بڑے کھیلوں کے مقابلوں میں شامل ہوچکی ہے اور اس کا مقصد ریاست کی باصلاحیت کھلاڑیوں کو قومی اور بین الاقوامی سطح پر اپنی صلاحیتیں دکھانے کا موقع فراہم کرنا ہے۔
انہوں نے کہا کہ اس بار لیگ کو صرف کرکٹ تک محدود نہیں رکھا جائے گا بلکہ اسے ’کرکٹ، کنسرٹ، جشن اور کھانے‘ کے تصور کے ساتھ ایک جامع کھیل اور تفریحی میلے کی شکل دی گئی ہے۔ افتتاحی تقریب میں معروف گلوکار شنکر مہادیون اور پنجابی گلوکارہ جیسمین سینڈلس اپنی پیشکش دیں گی۔ اس کے علاوہ ڈرون شو، لائٹ شو اور فوڈ کارنیول بھی توجہ کا مرکز ہوں گے۔
اس موقع پر لکھنؤ فالکنز کے کپتان بھونیشور کمار، میرٹھ ماویرکس کے کپتان رنکو سنگھ، کانپور سپر اسٹارز کے کپتان سمیر رضوی، نوئیڈا کنگز کے کپتان مادھو کوشک، گورکھپور لائنز کے کپتان آریان جویال اور کاشی رودراکش کے نمائندے بھوپیندر یادو موجود تھے۔
بھونیشور کمار نے کہا کہ گزشتہ سیزن کی خامیوں کو دور کرکے اس بار متوازن ٹیم تیار کی گئی ہے اور ٹیم خطاب جیتنے کے ہدف کے ساتھ میدان میں اترے گی۔ رنکو سنگھ نے کہا کہ ان کی ٹیم مسلسل اچھی کارکردگی کا مظاہرہ کرتی رہی ہے اور اس بار بھی کھلاڑی بغیر کسی دباؤ کے اپنی بہترین کارکردگی پیش کرنے کی کوشش کریں گے۔
دفاعی چیمپئن کاشی رودراکش کے نمائندے بھوپیندر یادو نے کہا کہ ٹیم کی تیاریاں مضبوط ہیں اور کھلاڑی خطاب کا دفاع کرنے کے لیے پوری صلاحیت کے ساتھ میدان میں اتریں گے۔ سمیر رضوی، مادھو کوشک اور آریان جویال نے کہا کہ یوپی ٹی20 لیگ نوجوان کھلاڑیوں کے لیے اپنی صلاحیتوں کے اظہار کا ایک بڑا پلیٹ فارم بن چکی ہے۔