یوم آزادی سے پہلے دہلی حکومت کی ترنگا یاترا میں ہزاروں افراد کی شرکت

نئی دہلی، 12 اگست (یو این آئی) دہلی کی وزیرِ اعلیٰ ریکھا گپتا نے کہا ہے کہ 15 اگست صرف آزادی کا جشن نہیں ہے، بلکہ بھارت کے شاندار سفر اور کامیابیوں کو یاد کرنے، ہندستان کے ترقیاتی سفر پر غور کرنے اور مستقبل کے لیے ملک کے عزم کو دہرانے کا موقع ہے۔
محترمہ گپتا نے بدھ کے روز ملک گیر ‘ہر گھر ترنگا’ مہم کے تحت انڈیا گیٹ سے کرتویہ پتھ تک ترنگا یاترا کی قیادت کرنے کے بعد لوگوں سے خطاب کرتے ہوئے یومِ آزادی کو 1947 کے بعد سے ہندستان کے ترقیاتی سفر پر غور کرنے اور مستقبل کے لیے ملک کے عزم کو دہرانے کا موقع بتایا۔ محترمہ گپتا نے کہا، "آزادی کے بعد سے ہندستان نے کئی چیلنجوں کا سامنا کرتے ہوئے ترقی، سائنس، ٹیکنالوجی، معیشت، تعلیم اور بنیادی ڈھانچے کے شعبے میں تاریخی پیش رفت کی ہے۔ ملک کی یہ پیش رفت کروڑوں شہریوں کی اجتماعی کوششوں کا نتیجہ ہے اور یومِ آزادی ہمیں یہ دیکھنے کا موقع فراہم کرتا ہے کہ ہم کتنا آگے آ چکے ہیں، ساتھ ہی یہ آنے والے برسوں کے لیے "اور بھی بڑے عزم” کا اعادہ کرنے کا موقع فراہم کرتا ہے۔”
دہلی حکومت نے اس پیدل مارچ کا اہتمام کیا تھا، جو انڈیا گیٹ سے شروع ہو کر رفیع مارگ سے ہوتے ہوئے کرتویہ پتھ پر ختم ہوا۔ اس یاترا میں بی جے پی رکنِ پارلیمنٹ اور پارٹی کے قومی صدر نتن نبین، دہلی بی جے پی صدر ہرش ملہوترا، کابینی وزراء پرویش صاحب سنگھ، آشیش سود، منجندر سنگھ سرسا اور رویندر اندرراج کے علاوہ اسکولوں اور کالجوں کے ہزاروں طلباء، این سی سی کیڈٹس، این ایس ایس رضاکاروں اور عام شہریوں نے شرکت کی۔
منتظمین نے بتایا کہ اس مارچ کا بنیادی مقصد تحرِیکِ آزادی کے مجاہدین کی قربانیوں کو سلام کرنا اورملک کی تعمیرِ میں نوجوانوں کی شرکت کو فروغ دینا تھا۔ مسٹر نبین نے اجتماع سے خطاب کرتے ہوئے کہا کہ وزیر اعظم نریندر مودی کی اپیل پر شروع ہوئی ‘ہر گھر ترنگا’ پہل اب ایک عوامی تحریک کی شکل اختیار کر چکی ہے۔ انہوں نے ہم وطنوں سے اپیل کی کہ وہ اس سال یومِ آزادی پر اس مہم میں بڑھ چڑھ کر حصہ لیں، ملک کی اتحاد و سالمیت کے عزم کو دہرائیں اور امر شہداء کو اپنا خراجِ عقیدت پیش کریں۔
محترمہ گپتا نے دہلی کے شہریوں سے یومِ آزادی پر اپنے گھروں میں ترنگا لہرانے اور مہم کا حصہ بننے کی اپیل کی۔ انہوں نے شہریوں کو ترنگے کے ساتھ سوشل میڈیا پر تصویریں شیئر کرنے کی ترغیب دی اور کہا کہ یہ صرف سرکاری پروگرام نہیں، بلکہ ‘احترام، فخر اور اتحاد کا اجتماعی اظہار’ ہے۔ قابلِ ذکر ہے کہ سال 2022 سے ہر سال یومِ آزادی سے پہلے منعقد ہونے والی ‘ہر گھر ترنگا’ مہم کا مقصد شہریوں کو گھروں اور عوامی مقامات پر قومی پرچم لہرانے کی ترغیب دینا ہے۔