انتظامی خامیوں پر کھیل کی وزارت نے ٹی ٹی ایف آئی کی منظوری معطل کردی

نئی دہلی، 12 اگست (یواین آئی) کھیل کی وزارت نے انتظامی خامیوں اور مقررہ مدت کے اندر انتخابات نہ کرانے پر بدھ کو ٹیبل ٹینس فیڈریشن آف انڈیا (ٹی ٹی ایف آئی) کی منظوری معطل کردی۔
وزارت نے انڈین اولمپک ایسوسی ایشن (آئی او اے) کو ملک میں ٹیبل ٹینس کے انتظام کی نگرانی کے لیے ایڈہاک کمیٹی تشکیل دینے کی ہدایت بھی دی ہے۔
یہ فیصلہ ٹی ٹی ایف آئی کی جانب سے پہلے جاری کیے گئے وجہ بتاؤ نوٹس کے جواب کو ’’غیر تسلی بخش‘‘ قرار دیے جانے کے بعد کیا گیا۔
وزارت کے حکم میں کہا گیا ہے کہ آئی او اے، بین الاقوامی ادارے آئی ٹی ٹی ایف سے مشاورت کے بعد ٹی ٹی ایف آئی میں باقاعدہ انتظامی ڈھانچہ بحال ہونے تک داخلی ضابطہ کار وضع کرنے اور ایڈہاک کمیٹی تشکیل دینے سمیت مناسب اقدامات کرے گا۔
یہ کارروائی قومی فیڈریشن سے متعلق تنازعات کی ایک کڑی ہے۔ رواں سال کے آغاز میں ایشین گیمز کے لیے ٹیم کے انتخاب کے عمل کو لے کر بھی ٹی ٹی ایف آئی تنقید کی زد میں آئی تھی۔
جون میں ہندوستان کی سرکردہ ٹیبل ٹینس کھلاڑی منیکا بترا نے الزام لگایا تھا کہ ٹی ٹی ایف آئی نے آئچی-ناگویا ایشین گیمز کے لیے ٹیم کے انتخاب کے دوران اپنے ہی آئین کی خلاف ورزی کی۔ ایشین گیمز 19 ستمبر سے 4 اکتوبر تک منعقد ہوں گے۔
فیڈریشن کی جانب سے ایشین گیمز کے لیے 10 رکنی دستے کے اعلان کے بعد منیکا کو ریزرو کھلاڑیوں میں شامل کیا گیا تھا۔ اس کے بعد 31 سالہ کھلاڑی نے انتخابی عمل کے طریقہ کار پر سوال اٹھایا تھا۔
منیکا کے مطابق ٹی ٹی ایف آئی نے انہیں بتایا تھا کہ ٹیم کا انتخاب ’’قواعد کے مطابق سختی سے‘‘ کیا گیا ہے، تاہم ان کے پاس موجود دستاویزات سے ظاہر ہوتا ہے کہ نو رکنی سلیکشن کمیٹی نے ایشین گیمز کی ٹیم کو حتمی شکل دی تھی۔