راشد خان کی شاندار کارکردگی، افغانستان نے ورلڈ کپ میں جگہ بنائی

بیلفاسٹ، 11 اگست (یواین آئی) اسٹار لیگ اسپنر راشد خان کی شاندار کارکردگی کی بدولت افغانستان نے آئرلینڈ کو پانچ میچوں کی ون ڈے سیریز کے دوسرے مقابلے میں تین وکٹ سے شکست دے کر سیریز میں 2-0 کی برتری حاصل کرلی۔ اس کامیابی کے ساتھ افغانستان نے اگلے سال ہونے والے ورلڈ کپ کے لیے بھی کوالیفائی کرلیا۔ یہ ورلڈ کپ میں اس کی مسلسل چوتھی شرکت ہوگی۔
پہلے گیند بازی کرتے ہوئے افغانستان نے فضل الحق فاروقی کی گیند پر اینڈریو بالبرنی کو جلد آؤٹ کرکے اچھی شروعات کی۔ پال اسٹرلنگ اور کیڈ کارمائیکل نے اننگز سنبھالنے کی کوشش کی، لیکن یامین احمدزئی نے شراکت توڑ دی۔ اس کے بعد راشد خان نے کارمائیکل کو ایل بی ڈبلیو کیا، جبکہ اے ایم غضنفر نے لورکن ٹکر اور کرٹس کیمفر کو آؤٹ کردیا۔ 21.3 اوور میں آئرلینڈ کی نصف ٹیم پویلین لوٹ چکی تھی۔
تاہم گیون ہوے اور جے مونڈرا نے نویں وکٹ کے لیے 76 رن کی قیمتی شراکت کرکے آئرلینڈ کو 128/8 سے 200 کے پار پہنچایا۔ شراکت ٹوٹنے کے بعد عظمت اللہ عمرزئی نے 47ویں اوور میں آئرلینڈ کی اننگز سمیٹ دی اور پوری ٹیم 206 رن پر آؤٹ ہوگئی۔ راشد خان اور اے ایم غضنفر نے تین، تین وکٹیں حاصل کیں۔
207 رن کے ہدف کے تعاقب میں رحمان اللہ گرباز نے جارحانہ آغاز کیا اور جے مونڈرا کے خلاف دو چھکے لگائے۔ گرباز نے 71 رن کی شاندار اننگز کھیلی، جبکہ ابراہیم زدران اور صدیق اللہ اٹل نے بھی اہم تعاون دیا۔ تاہم درمیان میں وکٹیں گرنے سے افغانستان مشکل میں پڑ گیا۔
مارک ایڈیئر کے ہاتھوں عمرزئی کے آؤٹ ہونے کے بعد افغانستان کو 30 رن درکار تھے اور اس کی صرف تین وکٹیں باقی تھیں۔ ایسے نازک وقت میں راشد خان نے ذمہ دارانہ اننگز کھیلی۔ دوسرے سرے پر احمدزئی نے وکٹ سنبھالے رکھی، جبکہ راشد نے رن بنانے کی ذمہ داری اٹھائی۔ آئرلینڈ آٹھویں وکٹ حاصل کرنے میں ناکام رہا اور راشد کی شاندار بلے بازی کی بدولت افغانستان نے 44.5 اوور میں ہدف حاصل کرلیا۔
مختصر اسکور: آئرلینڈ 46.3 اوور میں 206 رن (گیوین ہوے 36؛ اے ایم غضنفر 3/29، راشد خان 3/44)۔ افغانستان 44.5 اوور میں 207/7 (رحمان اللہ گرباز 71، راشد خان ناٹ آؤٹ 37)۔