پوڈیل کی جگہ لامیچھانے دوبارہ نیپال کے ون ڈے کپتان مقرر

کٹھمنڈو، 11 اگست (یواین آئی) لیگ اسپنر سندیپ لامیچھانے کو روہت پوڈیل کی جگہ ایک بار پھر نیپال کی ون ڈے ٹیم کا کپتان مقرر کیا گیا ہے۔
کرکٹ ایسوسی ایشن آف نیپال نے 30 اگست سے 12 ستمبر تک ملائیشیا میں ہونے والے اے سی سی مینز پریمیئر کپ کے لیے 14 رکنی ٹیم کا اعلان کردیا۔
یہ نیپال کے کپتان کی حیثیت سے لامیچھانے کا دوسرا دور ہوگا۔ اس سے قبل وہ 2022 میں 14 ون ڈے اور 18 ٹی 20 میچوں میں ٹیم کی قیادت کرچکے ہیں۔
قیادت میں یہ تبدیلی آئی سی سی مینز کرکٹ ورلڈ کپ لیگ 2 میں نیپال کی مسلسل چار شکستوں کے بعد کی گئی ہے، جس کے بعد آٹھ ٹیموں کی لیگ میں نیپال ساتویں نمبر پر رہا۔
لامیچھانے نے 77 بین الاقوامی میچوں میں 154 وکٹیں حاصل کی ہیں۔ 2021 میں پاپوا نیو گنی کے خلاف 11 رن دے کر چھ وکٹیں ان کی بہترین گیندبازی ہے۔ وہ آئی پی ایل، پی ایس ایل، بی بی ایل اور سی پی ایل سمیت مختلف ٹی 20 لیگز میں بھی کھیل چکے ہیں۔
اے سی سی مینز پریمیئر کپ کے لیے نیپال کی ٹیم: سندیپ لامیچھانے (کپتان)، روہت پوڈیل، آصف شیخ، ارجن کمال، دیو کھنال، دیپیندر سنگھ ایری، بی احمد، ایشان پانڈے، گلشن کمار جھا، شیر ملا، للت نارائن راجبنشی، کرن کے سی، ہیمنت دھامی اور سندیپ زورا۔