ٹیم میں واپسی کی امید برقرار: محمد شامی

نئی دہلی، 7 اگست (یو این آئی) ہندوستان کے تجربہ کار تیز گیندباز محمد شامی نے قومی ٹیم میں واپسی کی امید برقرار رکھی ہے۔ ان کے بچپن کے کوچ محمد بدرالدین نے انکشاف کیا ہے کہ شامی نے گزشتہ سیزن کے مقابلے میں پانچ کلوگرام وزن کم کیا ہے اور وہ آئندہ سیزن کے لیے پوری طرح پُرعزم ہیں۔
محمد شامی نے 2025 کی چیمپئنز ٹرافی کے بعد سے ہندوستان کے لیے کوئی بین الاقوامی میچ نہیں کھیلا۔ اگرچہ وہ 2023 ون ڈے ورلڈ کپ میں سب سے زیادہ وکٹیں لینے والے گیندباز رہے اور گزشتہ گھریلو سیزن میں رنجی ٹرافی کے سات میچوں میں 37 جبکہ وجے ہزارے ٹرافی کے سات میچوں میں 15 وکٹیں حاصل کیں، تاہم حالیہ عرصے میں انہیں قومی ٹیم میں جگہ نہیں مل سکی۔
محمد بدرالدین نے کہا، "شامی کا حوصلہ بلند ہے، وہ آئندہ سیزن کے لیے پوری طرح تیار ہیں۔ ان میں ابھی کافی کرکٹ باقی ہے اور اگر ملک کو ان کی ضرورت پڑی تو وہ ہر وقت دستیاب ہوں گے۔”
انہوں نے کہا کہ انگلینڈ میں ہندوستانی تیز گیندبازوں کی غیر مؤثر کارکردگی نے شامی جیسے تجربہ کار گیندباز کی اہمیت کو اجاگر کیا ہے۔ ان کے مطابق 2027 کے ون ڈے ورلڈ کپ میں جنوبی افریقہ کی کنڈیشنز میں شامی کا تجربہ ٹیم انڈیا کے لیے بہت مفید ثابت ہو سکتا ہے۔