واشنگٹن، 5 اگست (یو این آئی) عالمی شہرت یافتہ امریکی ریسلر اور 10 مرتبہ ڈبلیو ڈبلیو ای چیمپئن بروک لیسنر نے پیشہ ورانہ ریسلنگ سے ریٹائرمنٹ کا اعلان کر دیا ہے۔
49 سالہ لیسنر نے منگل کو "دی پیٹ میکفی شو” میں کہا کہ گزشتہ ہفتے ڈبلیو ڈبلیو ای سمر سلیم میں ان کی شرکت ان کے کیریئر کی آخری شرکت تھی۔
انہوں نے بتایا کہ رواں سال ریسل مینیا میں رنگ کے اندر اپنے جوتے اور دستانے اتارنے کے بعد انہیں محسوس ہوا تھا کہ ان کا کیریئر ختم ہو چکا ہے، لیکن بعد میں انہوں نے منیاپولس میں منعقدہ ہیل اِن اے سیل مقابلے میں آخری بار رنگ میں اترنے کا فیصلہ کیا۔
لیسنر نے کہا، "میں آج دنیا کو بتانا چاہتا ہوں کہ میں نے ریٹائرمنٹ اختیار کر لی ہے۔ سنیچر کا دن میرے لیے انتہائی جذباتی تھا۔ جب ریسل مینیا میں اوبا فیمی نے مجھے پٹخا تو میں نے محسوس کیا کہ اب میں مزید نہیں کھیل سکتا اور میرا کیریئر ختم ہو چکا ہے۔ تاہم کھیل نے مجھے ایک بار پھر پکارا اور میرے اندر ابھی کچھ توانائی باقی تھی، اسی لیے میں نے آخری بار رنگ میں قدم رکھا۔”
لیسنر کی ریٹائرمنٹ کے ساتھ ہی پیشہ ورانہ ریسلنگ کی تاریخ کے کامیاب ترین اور منفرد کیریئرز میں سے ایک کا اختتام ہو گیا۔
عبداللہ شفیق کی تاریخی 160 رنز کی اننگز، 49 سال بعد ویسٹ انڈیز میں نیا پاکستانی ریکارڈ
پورٹ آف اسپین، 5 اگست (یو این آئی): پاکستان کے سلامی بلے باز عبداللہ شفیق نے ویسٹ انڈیز کے خلاف دوسرے ٹیسٹ میچ میں شاندار 160 رنز کی ناقابلِ شکست اننگز کھیل کر نہ صرف ٹیم کو مضبوط پوزیشن میں پہنچایا بلکہ 49 سال پرانا پاکستانی ریکارڈ بھی اپنے نام کر لیا۔
کوئینز پارک اوول میں تیسرے روز کھیل کا آغاز ہوا تو عبداللہ شفیق 107 اور کپتان بابر اعظم 84 رنز کے ساتھ کریز پر موجود تھے۔
پاکستان نے اپنی پہلی اننگز 387 رنز پر ختم کی، جس میں عبداللہ شفیق 160 رنز بنا کر ناٹ آؤٹ رہے۔ ان کی یہ اننگز پاکستانی ٹیم کے لیے میچ میں انتہائی اہم ثابت ہوئی۔
عبداللہ شفیق 49 برس بعد ویسٹ انڈیز کی سرزمین پر ٹیسٹ کرکٹ میں 150 سے زائد رنز بنانے والے پہلے پاکستانی بلے باز بن گئے ہیں۔
اس سے قبل 1977 میں ماجد خان نے گیانا میں 167 رنز کی اننگز کھیل کر یہ کارنامہ انجام دیا تھا۔
اعداد و شمار کے مطابق پاکستان کی جانب سے بیرون ملک ٹیسٹ کرکٹ میں کھیلی گئی 150 سے زائد رنز کی آخری چار اننگز میں سے تین عبداللہ شفیق کے نام ہیں، جو ان کی غیر معمولی مستقل مزاجی کا ثبوت ہے۔
سن رائزرز ایسٹرن کیپ نے مچل مارش کو ٹیم میں شامل کر لیا
کیپ ٹاؤن، 5 اگست (یو این آئی) دفاعی چیمپئن سن رائزرز ایسٹرن کیپ نے آسٹریلیا کے تجربہ کار آل راؤنڈر مچل مارش کو اپنی ٹیم میں شامل کر لیا ہے۔ مارش پہلی بار جنوبی افریقہ کی فرنچائز ٹی ٹوئنٹی لیگ ایس اے 20 میں کھیلتے نظر آئیں گے۔
مارش ایسی مضبوط ٹیم کا حصہ بنے ہیں جس میں مارکو یانسن، اینرچ نورٹے، کوئنٹن ڈی کاک، ٹرسٹن اسٹبس اور ایڈم ملن جیسے کھلاڑی شامل ہیں۔ سن رائزرز ایسٹرن کیپ اب تک کھیلے گئے چار میں سے تین ایس اے 20 خطابات اپنے نام کر چکی ہے۔
ایس اے 20 کا پانچواں سیزن 17 جنوری سے شروع ہوگا، جبکہ اس سے قبل 7 اکتوبر کو منی نیلامی منعقد کی جائے گی۔ چار فرنچائزز میں مجموعی طور پر 19 کھلاڑیوں کی جگہیں خالی ہیں، جبکہ ڈربنز سپر جائنٹس اور پارل رائلز پہلے ہی اپنی 19 رکنی ٹیمیں مکمل کر چکے ہیں۔
سن رائزرز ایسٹرن کیپ نے اپنے بنیادی کھلاڑیوں کو برقرار رکھا ہے۔ ٹرسٹن اسٹبس مسلسل دوسرے سیزن میں ٹیم کی قیادت کریں گے، جبکہ لیگ کے دوسرے کامیاب ترین وکٹ لینے والے گیندباز مارکو یانسن ایک بار پھر بولنگ اٹیک کی قیادت کریں گے۔
مارش کے علاوہ ٹیم نے بنگلہ دیش کے لیگ اسپن آل راؤنڈر رشاد حسین کو بھی شامل کیا ہے، جنہوں نے 2024 ٹی ٹوئنٹی ورلڈ کپ میں راشد خان کے برابر وکٹیں حاصل کی تھیں۔ رشاد، افغانستان کے اسپنر اے ایم غضنفر کی جگہ لیں گے، جو اس بار ٹورنامنٹ کا حصہ نہیں ہوں گے۔
ظہیر خان کی اینکر اسپورٹس اے بی نے ‘جافنا کنگز ٹیم کو خریدا
اسٹاک ہوم، 5 اگست (یواین آئی) سابق ہندستانی تیز گیند باز ظہیر خان اور صنعت کار ناگیندر سدوتام کی مشترکہ ملکیت والی اینکر اسپورٹس اے بی کمپنی نے لنکا پریمیئر لیگ (ایل پی ایل) کی فرنچائز جافنا کنگز کو حاصل کر لیا ہے۔ اب ٹیم کا نیا نام اینکر جافنا کنگز ہوگا۔ اینکر اسپورٹس اے بی کے کنٹرول سنبھالنے کے ساتھ ہی جافنا کنگز ایک بار پھر منظم انتظامیہ کے تحت واپس آ گئی ہے۔ 23 جولائی سے یہ ٹیم سری لنکا کرکٹ (ایس ایل سی) اور ایل پی ایل کے حقوق ہولڈر انوویشن پروڈکشن گروپ (آئی پی جی) کے ہنگامی کنٹرول میں تھی، کیونکہ پچھلے مالکان کا معاہدہ ختم کر دیا گیا تھا۔ اس حصول کے ساتھ ہی جافنا کنگز اب اینکر اسپورٹس اے بی کے بڑھتے ہوئے عالمی ملٹی کلب اسپورٹس نیٹ ورک کا حصہ بھی بن گئی ہے۔
آئی پی جی کی پریس ریلیز کے مطابق، "اس حصول سے اینکر اسپورٹس کے بین الاقوامی پروگرام کو مضبوطی ملی ہے۔ اس کے تحت پہلے سے ہی بیلجیم کی یورپیین ٹی-20 پریمیئر لیگ میں اینٹورپ اینکرز اور کناڈا کی سپر 60 لیگ میں وینکوور اینکرز کی مرد اور خواتین ٹیمیں شامل ہیں۔”
یہ تبدیلی جافنا کنگز کے پچھلے مالک اسپورٹس کمیون کا معاہدہ ختم ہونے کے دو ہفتے سے بھی کم وقت میں ہوئی ہے۔ اسپورٹس کمیون کے شریک مالک، ہندستان کے سابق انڈر 19 کرکٹر منجوت کالرا اور کاروباری مینک گوئل تھے۔ کالرا کو 16 جولائی کو میچ فکسنگ کے الزام میں گرفتار کیا گیا تھا اور وہ فی الحال عدالتی تحویل میں ہیں، جبکہ گوئل کا کوئی پتہ نہیں ہے۔ اسپورٹس کمیون نے مئی میں جافنا کنگز کی ملکیت سنبھالی تھی۔ اس سے پہلے 2021 سے 2025 تک یہ فرنچائز لائیکا گروپ کے پاس تھی۔ جبکہ ابتدائی ایل پی ایل سیزن میں ٹیم کی ملکیت آرنلڈ آنندن اور راہل سود کی قیادت والے گروپ کے پاس تھی۔ ان تمام مالکانہ ادوار کا خاتمہ مالیاتی ذمہ داریوں کو پورا نہ کر پانے کی وجہ سے ہوا۔ کالرا کی گرفتاری کے بعد ایس ایل سی اور آئی پی جی کو مداخلت کرنی پڑی، ہنگامی فنڈز جاری کرنے پڑے اور موجودہ سیزن میں ٹیم کا انتظام اپنے ہاتھ میں لینا پڑا۔
اس حصول کے حوالے سے ناگیندر سدوتام نے کہا، "یہ ہمارے لیے ایک اہم قدم ہے۔ سری لنکا کی کرکٹ روایت انتہائی شاندار ہے اور ایل پی ایل نے کم وقت میں خود کو ایک بہترین اور مسابقتی لیگ کے طور پر قائم کیا ہے۔ اینکر جافنا کنگز ہمارے عالمی ویژن کا ایک فطری حصہ ہوگی۔ ہم اس ٹیم میں سرمایہ کاری کرنے اور لیگ کی ترقی میں اپنا حصہ ڈالنے کے لیے پرجوش ہیں۔”
ظہیر خان نے کہا، "میں ہمیشہ سے سری لنکا سے ابھرنے والی بہترین اور متنوع گیند بازی کی صلاحیت کا مداح رہا ہوں۔ اس ملک میں کھیلنے اور وقت گزارنے کی میری کئی یادیں ہیں۔ اب ایک مالک کے طور پر سری لنکن کرکٹ کا حصہ بننا میرے لیے انتہائی پرجوش ہے اور میں اینکر جافنا کنگز کے ساتھ اپنے نئے سفر کا بے صبری سے انتظار کر رہا ہوں۔”
ایل پی ایل ٹورنامنٹ ڈائریکٹر سمنتھا ڈوڈنویلا نے کہا، "ظہیر خان جیسے لیجنڈز کا اینکر جافنا کنگز سے جڑنا لیگ کے لیے ایک بڑی حصولیابی ہے۔ ان کا تجربہ اور رہنمائی سری لنکا کے نوجوان کھلاڑیوں کے لیے میدان کے اندر اور باہر دونوں جگہ انتہائی فائدے مند ثابت ہوگی۔”
دی ہنڈریڈ میں سن رائزرز لیڈز کا نیا ریکارڈ
لیڈز، 5 اگست (یو این آئی) دی ہنڈریڈ ٹورنامنٹ میں سن رائزرز لیڈز نے جارحانہ بیٹنگ کا شاندار مظاہرہ کرتے ہوئے ٹورنامنٹ کی تاریخ کا سب سے بڑا ٹیم اسکور قائم کر دیا۔ ٹیم نے لندن اسپرٹ کے خلاف مقررہ 100 گیندوں میں دو وکٹوں کے نقصان پر 241 رنز بنائے اور 37 رنز سے کامیابی حاصل کر کے پلے آف کی دوڑ میں اپنی امیدیں برقرار رکھیں۔
ہیڈنگلے میں کھیلے گئے میچ میں اوپنرز ریان ریکلٹن اور مچل مارش نے ٹیم کو جارحانہ آغاز فراہم کیا۔ ریان ریکلٹن نے 42 گیندوں پر ناقابلِ شکست 94 رنز کی اننگز کھیلی، جبکہ مچل مارش نے 37 گیندوں پر 76 رنز اسکور کیے۔
دونوں بیٹرز نے پہلی وکٹ کے لیے 148 رنز کی شراکت قائم کی، جو دی ہنڈریڈ ٹورنامنٹ کی تاریخ کی نئی ریکارڈ اوپننگ پارٹنرشپ ہے۔
بعد ازاں انگلینڈ کے ہیری بروک نے برق رفتار بیٹنگ کرتے ہوئے صرف 15 گیندوں پر نصف سنچری مکمل کی، جو ٹورنامنٹ کی تیز ترین نصف سنچری ہے۔
ہیری بروک نے 18 گیندوں پر 55 رنز کی دھواں دار اننگز کھیلی، جس میں پانچ چھکے اور پانچ چوکے شامل تھے، اور ٹیم کو ریکارڈ مجموعے تک پہنچانے میں اہم کردار ادا کیا۔
سن رائزرز لیڈز نے لندن اسپرٹ کے خلاف دو وکٹوں پر 241 رنز بنا کر دی ہنڈریڈ کی تاریخ کا سب سے بڑا ٹیم اسکور قائم کیا۔
واضح رہے کہ اس کامیابی کے بعد سن رائزرز لیڈز نے پلے آف مرحلے تک رسائی کی اپنی امیدیں برقرار رکھی ہیں، جبکہ لندن اسپرٹ پوائنٹس ٹیبل پر ساتویں نمبر پر موجود ہے۔
برازیل میں فٹبال میچ کے دوران طوطے کی انٹری، کھیل دو بار روکنا پڑ گیا
برازیلیا، 5 اگست (یو این آئی): برازیل میں جاری انڈر 15 فٹبال ٹورنامنٹ کے ایک میچ کے دوران اس وقت دلچسپ صورتحال پیدا ہوگئی جب ایک بڑا نیلے رنگ کا طوطا اچانک میدان میں آ گیا، جس کے باعث کھیل دو مرتبہ روکنا پڑا۔
فلیمینگو اور سیارا کے درمیان کھیلے جا رہے میچ کے 17ویں منٹ میں اچانک طوطا میدان میں داخل ہوگیا، جس سے کھلاڑی حیران اور پریشان ہو گئے۔ صورتحال کو دیکھتے ہوئے ریفری نے کھیل عارضی طور پر روک دیا۔
طوطا تقریباً 15 منٹ تک میدان میں موجود رہا اور بعد ازاں خود ہی اڑ کر چلا گیا، جس کے بعد میچ دوبارہ شروع کیا گیا۔
تاہم پہلے ہاف کے دوران طوطا ایک مرتبہ پھر میدان میں واپس آ گیا، جس کے باعث ریفری کو دوسری بار بھی کھیل روکنا پڑا۔
بعد ازاں میچ بغیر کسی مزید رکاوٹ کے مکمل ہوا، جس میں سیارا نے شاندار کم بیک کرتے ہوئے فلیمینگو کو 2-1 سے شکست دے دی۔
یہ دلچسپ واقعہ سوشل میڈیا پر بھی تیزی سے وائرل ہوگیا، جہاں صارفین نے مزاحیہ تبصرے کرتے ہوئے طوطے کو میچ کا "سب سے یادگار کھلاڑی” قرار دیا۔
2027 ون ڈے ورلڈ کپ کوالیفائر 22 فروری سے، مقام کا فیصلہ باقی
دبئی، 5 اگست (یو این آئی) 2027 آئی سی سی ون ڈے ورلڈ کپ کوالیفائر آئندہ سال 22 فروری سے 23 مارچ تک کھیلا جائے گا، تاہم ٹورنامنٹ کے میزبان ملک کا فیصلہ ابھی ہونا باقی ہے۔
آئی سی سی کے نئے فارمیٹ کے مطابق 10 ٹیموں پر مشتمل کوالیفائر کی فاتح ٹیم براہ راست 14 ٹیموں پر مشتمل ورلڈ کپ کے مرکزی مرحلے میں جگہ بنائے گی، جبکہ دوسرے، تیسرے اور چوتھے نمبر پر رہنے والی ٹیمیں سپر سیریز میں حصہ لیں گی، جہاں سے صرف ایک ٹیم مرکزی 12 ٹیموں کے مرحلے کے لیے کوالیفائی کرے گی۔
ورلڈ کپ 4 اکتوبر سے 11 نومبر 2027 تک جنوبی افریقہ، زمبابوے اور نمیبیا کے 12 مقامات پر کھیلا جائے گا۔
کوالیفائر میں آئی سی سی ون ڈے درجہ بندی میں 30 ستمبر 2026 تک میزبان ممالک کے علاوہ دو سب سے کم درجہ بندی والی مکمل رکن ٹیمیں، ورلڈ کپ لیگ 2 کی چار سرفہرست ٹیمیں اور ورلڈ کپ کوالیفائر پلے آف سے کوالیفائی کرنے والی چار ٹیمیں شریک ہوں گی۔
ادھر ویسٹ انڈیز اس وقت ون ڈے درجہ بندی میں دسویں نمبر پر ہے اور کٹ آف تاریخ سے قبل اسے صرف ہندوستان کے خلاف دو ون ڈے میچ کھیلنے ہیں۔ دوسری جانب افغانستان اور آئرلینڈ کے درمیان ہونے والی آئندہ سیریز بھی ویسٹ انڈیز کے امکانات پر اثر انداز ہو سکتی ہے۔ اگر آئرلینڈ یہ سیریز 4-1 یا 5-0 سے جیتتا ہے تو ویسٹ انڈیز کے لیے ٹاپ آٹھ میں جگہ بنانے کی امید برقرار رہے گی، بصورت دیگر اسے کوالیفائر کھیلنا پڑ سکتا ہے۔
واضح رہے کہ ویسٹ انڈیز 2023 کے ون ڈے ورلڈ کپ کے لیے بھی کوالیفائی نہیں کر سکا تھا، جب اسے ہرارے میں کھیلے گئے کوالیفائر میں سپر اوور میں نیدرلینڈز کے ہاتھوں شکست کا سامنا کرنا پڑا تھا۔
یو این آئی۔ م س
ذاتی وجوہات کے باعث ایڈن مارکرم دی ہنڈرڈ سے دستبردار، جوس بٹلر کپتان مقرر
لندن، 6 اگست (یو این آئی) جنوبی افریقہ کے کپتان ایڈن مارکرم ذاتی وجوہات کی بنا پر وطن واپس لوٹ گئے ہیں، جس کے باعث وہ دی ہنڈرڈ ٹورنامنٹ کے باقی میچوں میں حصہ نہیں لیں گے۔ ان کی غیر موجودگی میں جوس بٹلر کو مانچسٹر سپر جائنٹس کا نیا کپتان مقرر کیا گیا ہے، جبکہ نیوزی لینڈ کے آل راؤنڈر مائیکل بریسویل کو ان کے متبادل کے طور پر ٹیم میں شامل کیا گیا ہے۔
مارکرم، جو لکھنؤ سپر جائنٹس، ڈربن سپر جائنٹس اور مانچسٹر سپر جائنٹس کی نمائندگی کرتے ہیں، مارچ میں ہونے والی نیلامی کے بعد مانچسٹر ٹیم کے کپتان بنائے گئے تھے۔ ان کی قیادت میں ٹیم نے پہلے دو میچ جیتے، تاہم بعد کے تینوں مقابلوں میں شکست کا سامنا کرنا پڑا۔ مارکرم نے ابتدائی چار اننگز میں صرف 67 رنز بنائے، لیکن اتوار کو دی اوول میں نصف سنچری اسکور کی۔
فرنچائز نے اپنے بیان میں کہا کہ مارکرم ذاتی وجوہات کی بنا پر جنوبی افریقہ واپس چلے گئے ہیں اور کلب ان کے لیے نیک خواہشات کا اظہار کرتا ہے۔
بدھ کو ویلش فائر کے خلاف میچ میں جوس بٹلر ٹیم کی قیادت کریں گے۔ بٹلر اس سے قبل بھی مانچسٹر فرنچائز کی کپتانی کر چکے ہیں، تاہم 2025 چیمپئنز ٹرافی کے بعد انگلینڈ کی محدود اوورز کی کپتانی چھوڑنے کے بعد یہ ان کی پہلی قیادت ہوگی۔
35 سالہ مائیکل بریسویل حال ہی میں گلوبل سپر لیگ میں لاہور قلندرز کی نمائندگی کر رہے تھے۔ اگرچہ وہ بدھ کے میچ تک ٹیم کو دستیاب نہیں ہوں گے، تاہم گروپ مرحلے کے آخری دو مقابلوں میں کھیلیں گے، جہاں مانچسٹر سپر جائنٹس پلے آف میں جگہ بنانے کی کوشش کرے گی۔
مارکرم کی رخصتی کے بعد مانچسٹر سپر جائنٹس کو رواں سیزن میں پہلی بار اپنی پلیئنگ الیون میں تبدیلی کرنا پڑے گی، کیونکہ ٹیم نے اب تک پانچوں میچ ایک ہی الیون کے ساتھ کھیلے تھے۔
ویسٹ انڈیز کو کم سے کم رنز پر آؤٹ کرنے کی کوشش کریں گے: ساجد خان
پورٹ آف اسپین، 5 اگست (یو این آئی): پاکستان کرکٹ ٹیم کے آف اسپنر ساجد خان نے کہا ہے کہ ٹیم کی کوشش ہوگی کہ ویسٹ انڈیز کو دوسری اننگز میں کم سے کم رنز پر آؤٹ کر کے میچ میں برتری حاصل کی جائے۔
کوئینز پارک اوول میں میڈیا سے گفتگو کرتے ہوئے ساجد خان نے کہا کہ انہوں نے عبداللہ شفیق کا بھرپور ساتھ دیا اور عبداللہ نے شاندار اننگز کھیلی، تاہم بدقسمتی سے ٹیل اینڈرز زیادہ دیر کریز پر نہ ٹھہر سکے۔
انہوں نے کہا کہ پاکستانی بولرز نے جس انداز میں بولنگ کی، اس سے ٹیم کو بہترین مومینٹم ملا ہے اور کوشش ہوگی کہ چوتھے روز بھی اسی تسلسل کو برقرار رکھتے ہوئے ویسٹ انڈیز کو 60 سے 70 رنز کے اندر آؤٹ کر دیا جائے۔
ساجد خان کا کہنا تھا کہ میچ کے پہلے روز وکٹ میں نمی ہونے کی وجہ سے بولرز کو مدد مل رہی تھی، لیکن بعد میں پچ بیٹنگ کے لیے زیادہ سازگار ہو گئی۔
انہوں نے کہا کہ نئی گیند سے ابتدا میں بیٹنگ مشکل ہو سکتی ہے، تاہم اگر بیٹرز کچھ وقت کریز پر گزار لیں تو اس کے بعد رنز بنانا نسبتاً آسان ہو جاتا ہے۔
سری لنکا کے خلاف ٹیسٹ سیریز سے قبل سائی سدرشن کی واپسی کی راہ ہموار
کولمبو، 5 اگست (یو این آئی) ہندوستانی بلے باز سائی سدرشن، جو منگل کو ممبئی سے سری لنکا روانہ ہونے والی ٹیم کے ساتھ نہیں گئے تھے، توقع ہے کہ وہ 8 اگست تک کولمبو میں ٹیم میں شامل ہو جائیں گے۔
24 سالہ بائیں ہاتھ کے بلے باز اس وقت پاؤں کے انگوٹھے کی معمولی تکلیف سے صحت یاب ہونے کے عمل سے گزر رہے ہیں۔ وہ بنگلورو میں سینٹر آف ایکسیلنس میں دوبارہ بیٹنگ کی مشق شروع کر چکے ہیں اور امکان ہے کہ طبی عملہ انہیں جلد ہی ٹیم کے ساتھ شامل ہونے کی اجازت دے دے گا۔
اس وجہ سے سدرشن 7 اگست سے شروع ہونے والا تین روزہ وارم اپ میچ نہیں کھیل سکیں گے، تاہم 15 اگست سے گال میں شروع ہونے والے پہلے ٹیسٹ سے قبل ان کی مکمل فٹنس حاصل کر لینے کی امید ہے۔
سائی سدرشن اب تک سات ٹیسٹ میچوں میں 383 رنز بنا چکے ہیں، جن میں تین نصف سنچریاں شامل ہیں، اور انہیں نمبر تین پر شبھمن گل کی ٹیسٹ ٹیم کا اہم رکن سمجھا جاتا ہے۔
دریں اثنا، ہندوستانی کرکٹ کنٹرول بورڈ نے تصدیق کی ہے کہ ہرش دوبے، شِوانگ کمار، تنوش کوٹیان اور وپراج نگم کو سری لنکا میں پہلے ٹیسٹ کی تیاری کے لیے نیٹ گیندبازوں،یعنی پریکٹس کے دوران ٹیم کے بلے بازوں کو گیندبازی کرنے والے معاون گیندبازوں، کے طور پر ٹیم کے ساتھ شامل کیا گیا ہے۔
ہندوستانی ٹیم نے بدھ کو سری لنکا پہنچنے کے ایک دن بعد این سی سی گراؤنڈ میں اپنی پہلی تربیتی نشست منعقد کی۔ 9 اگست کو وارم اپ میچ ختم ہونے کے بعد ٹیم پہلے ٹیسٹ کے لیے گال روانہ ہوگی، جبکہ دوسرا ٹیسٹ 23 اگست سے کولمبو میں کھیلا جائے گا۔
فیفا صدر جیانی انفانٹینو نے ہنگامی اجلاس طلب کر لیا
رباط، 5 اگست (یو این آئی) عالمی فٹ بال کی تنظیم فیفا کے صدر جیانی انفانٹینو نے بڑھتے ہوئے دباؤ کے پیش نظر بدھ کو مراکش کے شہر رباط میں فیفا کے اعلیٰ عہدیداروں اور ملازمین کا ہنگامی اجلاس طلب کیا ہے۔
فیفا کے عالمی فٹ بال ترقیاتی شعبے کے سربراہ اور آرسنل کے سابق منیجر آرسین وینگر نے منگل کو جاری ایک بیان میں کہا کہ وہ ورلڈ کپ کے انتظام و انصرام کے لیے کسی نجی کمپنی سے سرمایہ کاری حاصل کرنے کے منصوبے میں شامل نہیں تھے، تاہم اس منصوبے کو واپس لینا "انتہائی ضروری اور بلا شبہ درست فیصلہ” تھا۔
موصولہ اطلاعات کے مطابق اجلاس میں فیفا کے سیکریٹری جنرل میٹیاس گرافسٹروم، چیف آف اسٹاف ڈینیل او ٹول، چیف لیگل آفیسر ایمیلیو گارسیا سلویرو، رکن ممالک کے شعبے کے سربراہ ایلخان ممدوف، انسانی وسائل کی سربراہ کمبرلی مورس، میڈیا ڈائریکٹر برائن سوانسن اور مواصلات کے ڈائریکٹر ڈیوڈ فیریلی سمیت فیفا انتظامیہ کے دیگر اعلیٰ حکام شرکت کریں گے۔
ذرائع کے مطابق فیفا میں انفانٹینو کے بعد دوسرے اہم ترین عہدیدار سمجھے جانے والے میٹیاس گرافسٹروم نے بھی اجلاس سے قبل تنظیم کے ملازمین سے رابطہ کیا ہے۔
