ایجنسیاں
جموں؍ ۴ ؍اگست
جموں و کشمیر کے ضلع پونچھ کے دور افتادہ سرنکوٹ علاقے میں دہشت گردوں کی مشتبہ نقل و حرکت کی اطلاع کے بعد منگل کو سیکورٹی فورسز نے بڑے پیمانے پر تلاشی آپریشن شروع کیا۔
حکام کے مطابق اطلاع ملنے پر جموں و کشمیر پولیس کے اسپیشل آپریشنز گروپ (ایس او جی) کے اہلکاروں نے راشٹریہ رائفلز کے جوانوں کے ساتھ مل کر دھارا سنگلہ، گوجر نار، کھیروالی ڈھوک اور ملحقہ جنگلاتی دیہات میں محاصرہ اور تلاشی مہم شروع کی۔
حکام نے بتایا کہ آپریشن اس اطلاع کے بعد شروع کیا گیا کہ گھنے جنگلاتی علاقے میں مشتبہ دہشت گردوں کے دو الگ الگ گروپوں کی نقل و حرکت دیکھی گئی ہے۔
آخری اطلاعات موصول ہونے تک سیکورٹی فورسز کا مشتبہ دہشت گردوں سے کوئی رابطہ نہیں ہوا تھا، تاہم تلاشی آپریشن جاری تھا اور اہلکار مشتبہ افراد کا سراغ لگانے کے لیے منظم انداز میں جنگلاتی علاقوں کی تلاشی لے رہے تھے۔
دریں اثنا، ضلع کٹھوعہ کے ہیرانگر سیکٹر میں بین الاقوامی سرحد کے قریب ایک مکان کے صحن سے منگل کی صبح ایک پرانا اور زنگ آلود مارٹر شیل برآمد ہوا۔
حکام کے مطابق کٹل برہمنہ گاؤں میں سبھاش چندر کے مکان پر کھدائی کا کام کرنے والے مزدوروں نے مشتبہ شے دیکھ کر فوری طور پر متعلقہ حکام کو اطلاع دی۔
اطلاع ملتے ہی پولیس کی ایک ٹیم بم ناکارہ بنانے والے دستے (بی ڈی ایس) کے ہمراہ موقع پر پہنچی، علاقے کو محفوظ بنایا اور مارٹر شیل کو احتیاط کے ساتھ وہاں سے ہٹا کر ناکارہ بنانے کے لیے منتقل کر دیا۔
