ایجنسیاں
سرینگر؍ ۴ ؍اگست
جنوبی کشمیر کے ضلع شوپیان کے درگڈ گاؤں میں منگل کو تیندوے کے حملے میں ایک کمسن لڑکی زخمی ہو گئی۔
سرکاری ذرائع کے مطابق زخمی لڑکی کی شناخت زینب دختر عافق احمد ٹھوکر، ساکن درگڈ، کے طور پر ہوئی ہے، جس پر ایک جنگلی تیندوے نے حملہ کر دیا۔
حملے میں زخمی ہونے کے بعد اسے فوری طور پر علاج کے لیے قریبی اسپتال منتقل کیا گیا، جہاں ڈاکٹروں کے مطابق اس کی حالت خطرے سے باہر اور مستحکم ہے۔
واقعے کے بعد مقامی لوگوں نے محکمۂ جنگلی حیات سے مطالبہ کیا ہے کہ علاقے میں اس نوعیت کے واقعات کی روک تھام کے لیے فوری اور مؤثر اقدامات کیے جائیں۔
دریں اثنا، جنوبی کشمیر کے ضلع اننت ناگ کے سالر علاقے کے ہمنادی جنگلات میں منگل کو ریچھ کے حملے میں ایک شخص زخمی ہو گیا۔
حکام کے مطابق یہ واقعہ صبح تقریباً ۱۱:۳۰ بجے پیش آیا۔ زخمی کی شناخت لال حسین کے طور پر ہوئی ہے، جس پر جنگل میں ریچھ نے حملہ کر دیا۔
حملے میں زخمی ہونے کے بعد اسے فوری طور پر علاج کے لیے قریبی اسپتال منتقل کیا گیا۔حکام نے عوام سے اپیل کی ہے کہ جنگلاتی علاقوں میں جاتے وقت احتیاط برتیں تاکہ اس طرح کے واقعات سے بچا جا سکے۔
