وزراء اور افسران کو مختلف اضلاع میں سرکاری تقریبات کی ذمہ داریاں سونپ دی گئیں
جموں؍۳ ؍اگست
جموں و کشمیر حکومت نے پیر کے روز مرکز کے زیر انتظام علاقے میں۷۹ یں یومِ آزادی کی تقریبات کے انعقاد کے لیے انتظامات کو حتمی شکل دیتے ہوئے وزیر اعلیٰ، نائب وزیر اعلیٰ، کابینہ وزراء، وزیر اعلیٰ کے مشیر اور سینئر سول افسران کو مختلف اضلاع میں سرکاری تقریبات کی صدارت اور سلامی لینے کی ذمہ داریاں سونپ دی ہیں۔
جنرل ایڈمنسٹریشن ڈپارٹمنٹ (جی اے ڈی) کی جانب سے جاری حکم نامے کے مطابق وزیر اعلیٰ عمر عبداللہ سرینگر کے بخشی اسٹیڈیم میں منعقد ہونے والی مرکزی تقریب کی صدارت کریں گے، جہاں وہ قومی پرچم لہرائیں گے اور پریڈ کی سلامی لیں گے۔
سرکاری حکم نامے کے مطابق نائب وزیر اعلیٰ سریندر کمار چودھری جموں میں یومِ آزادی کی تقریب کی قیادت کریں گے، جبکہ وزیر صحت و طبی تعلیم سکینہ مسعود ایتو کو اننت ناگ، وزیر جل شکتی، جنگلات، ماحولیات و قبائلی امور جاوید احمد رانا کو پونچھ، وزیر زراعت، دیہی ترقی و پنچایتی راج جاوید احمد ڈار کو بارہمولہ اور وزیر خوراک، شہری رسد، امور صارفین، ٹرانسپورٹ و آئی ٹی ستیش شرما کو کٹھوعہ میں تقریب کی صدارت اور سلامی لینے کی ذمہ داری سونپی گئی ہے۔
وزیر اعلیٰ کے مشیر ناصر اسلم وانی کو کپوارہ میں سرکاری تقریب کی ذمہ داری دی گئی ہے۔
حکم نامے کے مطابق دیگر تمام ضلعی ہیڈکوارٹروں میں متعلقہ ڈپٹی کمشنر یومِ آزادی کی تقریبات کی صدارت کریں گے اور سلامی لیں گے، جبکہ سب ڈویژن سطح پر سب ڈویژنل مجسٹریٹ (ایس ڈی ایم) تقریبات کی قیادت کریں گے۔ تحصیل، بلاک اور میونسپل ہیڈکوارٹروں میں تقریبات کی صدارت تحصیلدار یا متعلقہ ضلع کے ڈپٹی کمشنر کی جانب سے نامزد سینئر ترین سول افسر کریں گے۔
جنرل ایڈمنسٹریشن ڈپارٹمنٹ نے اس سلسلے میں حکم نامہ تمام انتظامی سیکریٹریوں، ڈائریکٹر جنرل پولیس، ایڈیشنل ڈائریکٹر جنرل پولیس (سی آئی ڈی)، لیفٹیننٹ گورنر کے پرنسپل سیکریٹری، تمام ڈپٹی کمشنروں اور دیگر متعلقہ حکام کو ارسال کرتے ہوئے ہدایت دی ہے کہ جموں و کشمیر بھر میں۷۹ ویں یومِ آزادی کی تقریبات کے پُرامن اور کامیاب انعقاد کو یقینی بنایا جائے۔
