نئی دہلی، 31 جولائی (یو این آئی) دہلی کی وزیراعلیٰ ریکھا گپتا نے جمعہ کو دارالحکومت میں ودیا واہنی یوجنا کا افتتاح کرکے تین ہزار سے زیادہ طالبات کو سائیکلیں تقسیم کیں۔
محترمہ گپتا نے آج مشرقی ونود نگر میں واقع اسپورٹس کمپلیکس میں منعقدہ تقریب میں دہلی حکومت کے اہم منصوبے ودیا واہنی کا افتتاح کیا۔ انہوں نے دہلی حکومت کے اسکولوں کی نویں جماعت میں پڑھنے والی 3,000 سے زیادہ طالبات کو مفت سائیکلیں تقسیم کیں۔ اس موقع پر وزیراعلیٰ نے طالبات سے بات چیت کی، ان کی پڑھائی، مستقبل کے منصوبوں اور خوابوں کے بارے میں معلومات حاصل کیں اور انہیں پورے اعتماد اور لگن کے ساتھ تعلیم حاصل کر کے زندگی میں آگے بڑھنے کی ترغیب دی۔
انہوں نے کہا کہ آج کا پروگرام ناری شکتی کے احترام اور ہر بیٹی کو تعلیم کے ذریعے بااختیار بنانے کے ہمارے اجتماعی عزم کا جشن ہے۔ وزیراعظم نریندر مودی نے ترقی یافتہ ہندوستان کی تعمیر میں خواتین کی قیادت میں ترقی کو مرکز میں رکھا ہے اور تعلیم کو خواتین کو بااختیار بنانے کا سب سے مؤثر ذریعہ مانا ہے۔ ودیا واہنی یوجنا اسی دور اندیش سوچ سے متاثر ہو کر شروع کی گئی ہے۔
وزیراعلیٰ نے کہا کہ ودیا واہنی یوجنا کے تحت مرحلہ وار طریقے سے دہلی حکومت کے اسکولوں میں پڑھنے والی تقریباً 1 لاکھ 40 ہزار طالبات کو مفت سائیکلیں فراہم کی جائیں گی۔ یہ اسکیم آنے والے برسوں میں بھی اسی طرح جاری رہے گی۔ یہ اسکیم طالبات کے اسکول تک محفوظ اور آسان آمدورفت کو یقینی بنائے گی، ان کے وقت کی بچت کرے گی، اسکولوں میں باقاعدہ حاضری بڑھائے گی، ڈراپ آؤٹ کے امکان کو کم کرے گی اور سرپرستوں کی روزمرہ کی تشویش کو بھی کم کرے گی۔
انہوں نے کہا کہ ایک سائیکل صرف نقل و حمل کا ذریعہ نہیں ہوتی، بلکہ یہ آزادی، اعتماد، وقار، خود انحصاری اور موقع کی علامت ہے۔ تعلیم بااختیار بنانے کی سب سے مضبوط بنیاد ہے۔ جب ایک بیٹی تعلیم حاصل کرتی ہے تو وہ نہ صرف علم حاصل کرتی ہے، بلکہ اعتماد، بیداری اور اپنے مستقبل سے جڑے صحیح فیصلے کرنے کی صلاحیت بھی پیدا کرتی ہے۔ یہ سائیکل صرف ایک تحفہ نہیں، بلکہ ایک نئے سفر کی شروعات ہے۔ انہوں نے طالبات سے اپیل کی کہ وہ پوری لگن اور نظم و ضبط کے ساتھ تعلیم حاصل کریں، سائیکل کا ذمہ داری کے ساتھ استعمال کریں، ٹریفک قوانین کی پاسداری کریں اور ہمیشہ روڈ سیفٹی کو ترجیح دیں۔
اس موقع پر دہلی کے وزیرِ تعلیم آشیش سود نے کہا کہ یہ پروگرام اس لیے بھی خاص ہے کیونکہ دہلی کی قیادت ایک خاتون وزیراعلیٰ کے ہاتھوں میں ہے، جو یہ یقینی بنا رہی ہیں کہ بیٹیاں تعلیم، سلامتی اور بااختیاری حکومت کی اعلیٰ ترین ترجیحات میں رہیں۔ جب خواتین کو قیادت کا موقع ملتا ہے تو پالیسیوں کے مرکز میں خواتین کا احترام، ان کی تعلیم اور ان کی بااختیاری خود بخود آ جاتی ہے اور آج کا پروگرام اس کی ایک مضبوط مثال ہے۔
وزیرِ تعلیم نے کہا کہ نویں جماعت میں پہنچنے کے بعد اسکول کے فاصلے اور نقل و حمل کی دشواریوں کی وجہ سے متعدد طالبات کی تعلیم متاثر ہوتی رہی ہے۔ ‘ودیا واہنی’ یوجنا ان رکاوٹوں کو ختم کرنے کی سمت میں ایک اہم قدم ہے۔ ماضی میں تعلیم کے شعبے میں بڑے بڑے دعوے کیے گئے، لیکن متعدد سرکاری اسکولوں میں بنیادی سہولیات اور طالبات کی حقیقی ضروریات کو نظر انداز کیا جاتا رہا۔ موجودہ حکومت نے تشہیر کے بجائے تعلیم کو قوم کی تعمیر کا ذریعہ مانتے ہوئے ترجیحات بدلی ہیں۔
