ڈھائی ہزار لیٹر سے زائد گھی اور۲۶۰۰کلو منجمد گوشت ضبط؛ ایف ڈی اے کی عوام سے مشکوک غذائی اشیا کی اطلاع دینے کی اپیل
(ایجنسیاں)
سرینگر؍۳۱ جولائی
جموں و کشمیر فوڈ اینڈ ڈرگس ایڈمنسٹریشن (ایف ڈی اے) نے نیشنل فوڈ لیبارٹری غازی آباد کی رپورٹ کے بعد چار برانڈز کے گھی کو غیر محفوظ قرار دیتے ہوئے ان کے خلاف کارروائی شروع کر دی ہے، جبکہ سرینگر میں غلط لیبل اور غیر صحت بخش حالات میں ذخیرہ کیے گئے۲۶۰۰کلو گرام منجمد گوشت کو بھی ضبط کر لیا گیا ہے۔
سرکاری بیان کے مطابق ڈیری موہن، اپنا ڈیری ملک، ساہی تاج اور ملک بائٹ نامی گھی کے چار نمونوں کو نیشنل فوڈ لیبارٹری، غازی آباد نے انسانی استعمال کے لیے غیر محفوظ قرار دیا ہے۔
لیبارٹری رپورٹ کی بنیاد پر ضلع اننت ناگ کے نامزد فوڈ سیفٹی افسر نے متعلقہ بیچ نمبروں سے تعلق رکھنے والے۱۲۵۰ لیٹر گھی کو، جس کی مالیت تقریباً۴ لاکھ۸۸ ہزار روپے بتائی گئی ہے، ضبط کر کے فوڈ سیفٹی اینڈ اسٹینڈرڈز ایکٹ۲۰۰۶کے تحت اس کی فروخت اور تقسیم پر پابندی عائد کر دی ہے۔
بیان کے مطابق جموں ڈویژن میں بھی فوڈ سیفٹی ٹیموں نے متعلقہ برانڈز کے مزید تین نمونے حاصل کر کے معیار اور حفاظت کی جانچ کے لیے این اے بی ایل سے منظور شدہ لیبارٹریوں کو بھیج دیے ہیں۔
اس دوران جموں ڈویژن میں۱۲۷۷ لیٹر گھی بھی، جس کی مالیت تقریباً۴لاکھ۹۷ ہزار روپے ہے، لیبارٹری رپورٹ آنے تک احتیاطی طور پر ضبط کر لیا گیا ہے۔
ایک علیحدہ کارروائی میں فوڈ سیفٹی ٹیم سرینگر نے گوشت اور گوشت سے تیار شدہ مصنوعات فروخت کرنے والے سات اداروں کا معائنہ کیا۔
معائنے کے دوران کواڈارہ، بَبغیر میں واقع ایک ادارے سے۲۶۰۰ کلو گرام منجمد گوشت، جس کی مالیت تقریباً۵ لاکھ۹۸ ہزار روپے ہے، ضبط کیا گیا۔
حکام کے مطابق گوشت کی پیکنگ پر درج معلومات اور اندر موجود مصنوعات میں مطابقت نہیں پائی گئی، جس کے باعث اسے فوڈ سیفٹی اینڈ اسٹینڈرڈز ایکٹ۲۰۰۶؍اور متعلقہ ضابطوں کے تحت غلط لیبل قرار دیا گیا۔ مزید یہ کہ منجمد گوشت کو غیر صحت بخش اور غیر معیاری حالات میں ذخیرہ کیا گیا تھا۔
اس سلسلے میں فوڈ اینڈ ڈرگس ایڈمنسٹریشن نے ایڈیشنل ڈپٹی کمشنر سرینگر، جو اس معاملے میں ایڈجوڈیکیٹنگ آفیسر ہیں، کے روبرو فوڈ سیفٹی اینڈ اسٹینڈرڈز ایکٹ۲۰۰۶ کی دفعہ۶۱ کے تحت غلط یا گمراہ کن معلومات فراہم کرنے اور دفعہ۵۶ کے تحت غیر صحت بخش حالات میں خوراک ذخیرہ کرنے کا مقدمہ درج کر دیا ہے۔
حکام کے مطابق دفعہ۶۱ کے تحت زیادہ سے زیادہ۱۰ لاکھ روپے جبکہ دفعہ۵۶ کے تحت ایک لاکھ روپے تک جرمانے کی گنجائش ہے۔
فوڈ اینڈ ڈرگس ایڈمنسٹریشن نے عوام سے اپیل کی ہے کہ اگر ممنوعہ گھی کے مذکورہ بیچ مارکیٹ میں فروخت ہوتے نظر آئیں یا کسی غیر محفوظ، ملاوٹ شدہ یا غلط لیبل والی غذائی شے کے بارے میں اطلاع ہو تو فوری طور پر ٹول فری ہیلپ لائن۱۰۴ پر رابطہ کرکے متعلقہ حکام کو آگاہ کریں۔
