ایجنسیاں
اننت ناگ؍۳۰جولائی
فوڈ اینڈ ڈرگز ایڈمنسٹریشن جموں و کشمیر کے کمشنر کی ہدایات پر فوڈ سیفٹی ڈپارٹمنٹ (ایف ایس ڈی) اننت ناگ نے جون۲۰۲۶ کے دوران ضلع بھر میں خصوصی مہم چلا کر بازاروں میں فروخت ہونے والے مختلف برانڈز کے گھی کے معیار اور محفوظ ہونے کا جائزہ لیا۔
اس مہم کے دوران ضلع کے مختلف بازاروں اور تجارتی مراکز سے گھی کے۱۸ مختلف نمونے جمع کیے گئے، جنہیں تجزیے کے لیے نیشنل فوڈ لیبارٹری (این ایف ایل)، غازی آباد بھیجا گیا۔
لیبارٹری کی رپورٹ کے مطابق پانچ نمونے فوڈ سیفٹی اینڈ اسٹینڈرڈز ایکٹ‘۲۰۰۶کی دفعات کے تحت ’غیر محفوظ‘ قرار دیے گئے ہیں۔
غیر محفوظ قرار دیے گئے گھی کے برانڈز یہ ہیں:دیسی گھی، ڈیری موہن (بیچ نمبر ۰۵)‘اپنا ڈیری ملک (بیچ نمبر DM-06)‘شاہی تاج (بیچ نمبر 134A)‘نندنی (بیچ نمبر ND-28) اورکاؤ گھی، ملک بائٹ (بیچ نمبر 137)۔
لیبارٹری کی رپورٹ موصول ہونے کے بعد نامزد فوڈ سیفٹی آفیسر، اننت ناگ نے ان تمام برانڈز کی فروخت پر ضلع اننت ناگ کی حدود میں فوری طور پر اور آئندہ احکامات تک پابندی عائد کر دی ہے۔
فوڈ سیفٹی محکمہ نے عوام سے اپیل کی ہے کہ وہ گھی اور دیگر غذائی اشیاء خریدتے وقت احتیاط سے کام لیں، جبکہ فوڈ بزنس آپریٹروں کو ہدایت دی گئی ہے کہ وہ فوڈ سیفٹی اینڈ اسٹینڈرڈز ایکٹ‘۲۰۰۶ کی تمام دفعات پر سختی سے عمل درآمد کو یقینی بنائیں۔
محکمہ نے اس عزم کا اعادہ کیا کہ عوام کو محفوظ اور معیاری غذائی اشیاء کی فراہمی یقینی بنانے کے لیے باقاعدہ معائنے، نمونوں کی جانچ اور سخت قانونی کارروائیاں آئندہ بھی جاری رکھی جائیں گی۔
