سرینگر؍۲۸ جولائی
جموں و کشمیر کے شوپیان اور اننت ناگ اضلاع میں پیش آئے دو الگ الگ سڑک حادثات میں ایک افسر سمیت سیکورٹی فورسز کے کم از کم۱۱؍ اہلکار زخمی ہوگئے۔ حکام نے منگل کو یہ اطلاع دی۔
حکام کے مطابق پیر کی دیر رات شوپیان ضلع کے واچی علاقے میں سی آر پی ایف اور جموں و کشمیر پولیس کے اہلکاروں کو لے جانے والی ایک بنکر گاڑی مرکزی سڑک سے پھسل کر حادثے کا شکار ہوگئی۔
اس حادثے میں سی آر پی ایف کے ایک انسپکٹر سمیت سات اہلکار زخمی ہوئے، جبکہ ایک پولیس اہلکار بھی زخمیوں میں شامل ہے۔
ایک دوسرے حادثے میں ضلع اننت ناگ کے پہلگام علاقے میں ایک شہری پک اپ وین بے قابو ہو کر آئی ٹی بی پی کے اہلکاروں کے عارضی بنکر سے ٹکرا گئی، جس کے نتیجے میں آئی ٹی بی پی کے تین اہلکار زخمی ہوگئے۔
حکام نے بتایا کہ حادثے میں پک اپ وین کا ڈرائیور بھی زخمی ہوا، تاہم ابتدائی تحقیقات میں کسی بھی قسم کی شرارت یا تخریب کاری کے امکان کو مسترد کر دیا گیا ہے۔ (ایجنسیاں)
