خوراک، ایندھن اور قیمتی دھاتوں کی قیمتوں میں اضافے سے خردہ مہنگائی 3.93 فیصد پر پہنچ گئی

نئی دہلی، 12 جون (یو این آئی) خوراک کی اشیا، ایندھن اور قیمتی دھاتوں کی قیمتوں میں اضافے کے باعث مئی 2026 میں ملک میں صارف قیمت اشاریہ (سی پی آئی) پر مبنی خردہ مہنگائی کی شرح بڑھ کر 3.93 فیصد ہو گئی۔
قومی شماریاتی دفتر (این ایس او) کی جانب سے جمعہ کو جاری اعداد و شمار کے مطابق اپریل میں خردہ مہنگائی 3.48 فیصد تھی، جبکہ مئی میں مسلسل چوتھے ماہ اضافہ ریکارڈ کیا گیا۔
اعداد و شمار کے مطابق دیہی علاقوں میں مہنگائی کی شرح 4.25 فیصد اور شہری علاقوں میں 3.53 فیصد رہی۔
خوراکی اشیا کی مہنگائی کی شرح 4.78 فیصد درج کی گئی، جبکہ پان اور تمباکو مصنوعات میں مہنگائی 6.62 فیصد اور مال برداری خدمات میں 7.63 فیصد رہی۔
رپورٹ کے مطابق گزشتہ ایک سال کے دوران سب سے زیادہ اضافہ چاندی کے زیورات کی قیمتوں میں دیکھا گیا، جو 155 فیصد بڑھ گئیں۔ اس کے بعد ٹماٹر کی قیمت میں 48 فیصد اور سونے، ہیرے اور پلاٹینم کے زیورات کی قیمتوں میں 41 فیصد اضافہ ریکارڈ کیا گیا۔
دوسری جانب بعض اشیا کی قیمتوں میں کمی بھی دیکھی گئی۔ آلو 24 فیصد، مٹر 11 فیصد اور موٹر کاروں و جیپوں کی قیمتیں تقریباً 7 فیصد کم ہوئیں۔
ریاستوں میں تلنگانہ میں سب سے زیادہ 6.71 فیصد مہنگائی ریکارڈ کی گئی، جبکہ تمل ناڈو میں 5.11 فیصد، آندھرا پردیش میں 4.90 فیصد، کرناٹک میں 4.59 فیصد اور اوڈیشہ میں 4.54 فیصد مہنگائی درج کی گئی۔